Հանրային ծառայությունները կարգավորող հանձնաժողովը (ՀԾԿՀ) ընդունեց իր իսկ առաջարկը գազի սակագնի վերաբերյալ, համաձայն որի՝ հազար խորանարդ մետր գազի գինը կկազմի միջինը 266.7 դոլար: Համաձայն այս որոշման՝ գազի սակագինը բնակիչների համար չի բարձրանում, այլ բարձրանում է տնտեսվարողների համար՝ միջինը՝ 4.5 տոկոսով: Այս նոր սակագինն ուժի մեջ կմտնի առաջիկա ամսում՝ հուլիսի 19-ից:
«Կասեցում» քաղաքացիական նախաձեռնության համակարգող Սամսոն Գրիգորյանը համամիտ չէ սույն որոշման այն մասի հետ, թե գազի գնի թանկացումը վերաբերելու է միայն տնտեսվարող սուբյեկտներին: Նրա խոսքերով՝ այս ամենը որևէ լավ բանի չի հանգեցնելու:
«Բիզնեսին վերաբերող յուրաքանչյուր ծախս, յուրաքանչյուր թանկացում, կլինի դա գազի սակագին, հարկ, մաքս, տրանսպորտային ծախս, թե մի այլ բան՝ առաջին հերթին բերում է ապրանքի գնի թանկացման, ինքնարժեքի բարձրացման, որի համար վճարում է քաղաքացին, վճարում է սպառողը, հետևաբար այդ բոլոր թանկացումները վերաբերում են հենց քաղաքացիներին, այսինքն՝ այստեղ ասել, թե գազը թանկանում է միայն բիզնես սեկտորի համար՝ շատ խիստ կասկածելի է, ավելին՝ սխալ մտայնություն է: Հաշվի առնելով նշածս հանգամանքը՝ կրկնում եմ՝ այս որոշմամբ՝ գազը թանկանում է ամբողջ բնակչության համար, ուստի այստեղ շարքային քաղաքացին նորից տուժելու է: Ինչ վերաբերում է բիզնեսին սրանից բխող վնասներին, ապա ասեմ՝ գների թանկացում, եկամտի անկում, իսկ յուրաքանչյուր թանկացում իր հերթին նշանակում է նաև ապրանքաշրջանառության նվազում, այսինքն, միանշանակ, ապրանքների վաճառքի ծավալի անկում կլինի, որովհետև այս ամենը միևնույն շղթայով մեկը մյուսի հետ փոխկապակցված գործոններ են»,- «Առաջին լրատվական»-ի հետ զրույցում շեշտեց Սամսոն Գրիգորյանը:
Հարցին՝ այդ դեպքում հնարավո՞ր է, որ սրա արդյունքում որոշ տնտեսվարող սուբյեկտներ դադարեցնեն իրենց գործունեությունը, որոշ ձեռնարկություններ կանգնեն փակման եզրին, Գրիգորյանը պատասխանեց.
«Եթե ասենք, որ կոնկրետ այս պատճառով որոշ ՓՄՁ-ներ կփակվեն, մի փոքր ամպագորգոռ կհնչի, բայց, ընդհանուր առմամբ, կարող եմ նշել, որ քայլերի հաջորդականությունը կարող է հանգեցնել նաև այսպիսի սցենարի: Եղած խնդիրների վրա կգումարվեն նորերը. այսօր գազը թանկացավ, վաղը, ենթադրենք, տրանսպորտը կարող է թանկանալ, մյուս օրը էլեկտրաէներգիան, էն մյուս օրը՝ մի ուրիշ բան և այդպես շարունակ, ինչը, միանշանակ, բերելու է գնողունակության անկման: Հետևաբար, սա նշանակում է, որ բիզնեսի համար այլևս ձեռնտու չի լինի աշխատելն ու հարկեր վճարելը»:
Այս համատեքստում մեր զրուցակիցը նկատեց նաև, որ գազի գնի խնդիրը կրում է ոչ թե լոկալ բնույթ, այլ միջպետական:
«Այսինքն, սա տնտեսվարողների լուծելիք հարց չի: Չեմ կարծում, թե բողոքի ցույցերով հնարավոր լինի այս հարցը լուծել: Այս խնդիրը պետական մակարդակի վրա է գտնվում, ընդ որում՝ այնպիսի խնդիր է, որն անգամ պետության համար, ըստ իս, դժվար կլինի լուծել, որովհետև միջպետական պայմանագրի վերանայման մասին է խոսքը՝ 2013թ-ի կնքված գազային խայտառակ պայմանագրի հետևանք է սա»,-ասաց Գրիգորյանը:
-Արդյո՞ք կառավարությունը չի կարող այսպիսի որոշումից հետո որևէ աջակցություն ցույց տալ բիզնեսին այս ճգնաժամային պայմաններում,- հետաքրքրվեցինք նրանից:
«Եթե կառավարությունն աջակցություն էլ ցույց տա, ամեն դեպքում, դա տնտեսվարողների հաշվին է լինելու, մեր հարկերի բարձրացման հաշվին է լինելու, այսինքն՝ ստացվելու է փչացած կառուսել, ինչը ես միանգամայն անիմաստ քայլ եմ համարում:
Կրկնում եմ՝ այստեղ կառավարության հիմնական և կարևոր անելիքը «Գազպրոմ»-ի հետ ճիշտ իրավահարաբերությունների հաստատումն է, լուրջ փոփոխությունների գնալը, որովհետև այն, որ մենք գերի ենք ընկել այդ գազային պայմանագրի ձեռքը՝ դա փաստ է»,-արձագանքեց Սամսոն Գրիգորյանը:
Հիշեցնենք, որ այս տարվա ապրիլի 1-ին «Գազպրոմ Արմենիա» ընկերությունը սպառողներին մատակարարվող գազի սակագնի վերանայման հայտով դիմել էր ՀԾԿՀ, հանձնաժողովն էլ սեփական առաջարկն էր ներկայացրել, ըստ որի՝ սակագնի բարձրացումն ավելի քիչ պետք է լիներ, քան «Գազպրոմ Արմենիա»-ի հայտով էր նախատեսվում՝ 275 դոլար: Ընկերությունը ՀԾԿՀ-ի վերոնշյալ մոտեցումը գազի սակագնի հարցում ընդունելի էր համարել, սակայն ոչ բավարար: Ըստ ընկերության գլխավոր տնօրեն Հրանտ Թադևոսյանի՝ գազի սակագինը պետք է սահմանվեր ոչ պակաս քան 275 ԱՄՆ դոլար։
