Մարտի 1-ի գործով ամբաստանյալ, ՀՀ երկրորդ նախագահ Ռոբերտ Քոչարյանի խափանման միջոցը կփոխվի, 2 միլիարդ գրավի դիմաց նա ազատ կարձակվի. այս մասին որոշումը նախօրեին հրապարակել է դատավոր Արսեն Նիկողոսյանը: Գլխավոր դատախազությունը Վճռաբեկ դատարան բողոք կներկայացնի Ռոբերտ Քոչարյանին գրավի դիմաց ազատ արձակելու որոշման դեմ:
Թեմայի շուրջ «Առաջին լրատվական»-ի հետ քննարկմանը մասնակցեցին փաստաբաններ Տիգրան Եգորյանը և Կարապետ Բադալյանը:
«Այս տուրբուլենտությունը խորացել է, դա պայմանավորված չէ միայն Քոչարյանի գործով… Դրա հիմնական պատճառն այն է, որ թեև 2018թ. հեղափոխության արդյունքնում ՀՀ-ն կանգնեց ժողովրդավարացման ճանապարհին, և դեմոկրատական կարգը եկավ փոխարինելու տոտալիտար, ավտորիտար կարգին, բայց պետության իրավական քաղաքականությունը ձախողվեց ու մինչ օրս այդ կապակցությամբ ճանապարհային քարտեզ չի դրվել սեղանին: Եվ այսօր, ինչպես Քոչարյանի գործով, այնպես էլ բազմաթիվ այլ ոլորտներում, հատկապես դատական իշխանությունում այդ տուրբուլենտությունը պայմանավորված է պետության հստակ իրավական քաղաքականության և դրա անշեղ իրագործման բացակայությամբ:
Դատական համակարգը տարիներ շարունակ սովոր է եղել աշխատել հիմնականում հանձնարարություններով… Դատական համակարգը բացասական առումով բավական հետևողական «աշխատանք է» տանում՝ ոչ միայն Ռ. Քոչարյանի կալանքի հետ կապված, այլ նաև շատ այլ զգայուն գործերով»:
«Ռ. Քոչարյանի գործը շատ կարևոր է. սա էտալոնային գործ պետք է լինի, արդարադատության բոլոր պահանջների պահպանությամբ պետք է գործի քննությունը , և արդարության պահանջների պահպանությամբ քննությունը պետք է այսուհետ բոլոր դատական պրոցեսների համար պետք է դառնա հիմնական ուղենիշը, օրենքի և իրավունքի պաշտպանությունը»,- ընդգծեց Կարապետ Բադալյանը:
«Քոչարյանի՝ մյուսների վրա ազդեցությունը և ռիսկերը շատ մեծ են,- նշեց Տիգրան Եգորյանը՝ հավելելով, որ այդ ռիսկերը հնարավոր է նվազեցնել միայն կալանքը որպես խափանման միջոց օգտագործելով: Նրա դիտարկմամբ՝ Քոչարյանը մեծ կարողություն ունի, մեծ է հավանականությունը, որ կխոչընդոտի Մարտի 1-ի գործի քննությունը:
Կարապետ Բադալյանի խոսքով՝ Վճռաբեկ դատարանում դատական համակարգը առողջացման նշույլներ է ցույց տալիս. «Պրոցեսները մի քայլ մոտեցնում են մեր երազանքների դատական համակարգին»:
Մանրամասն՝ տեսանյութում: