«Գազպրոմ Արմենիա»-ն ստիպված կլինի 1000 մարդ կրճատել։ Այս մասին Հանրային ծառայությունները կարգավորող հանձնաժողովի նիստից հետո լրագրողների հետ զրույցում ասաց «Գազպրոմ Արմենիա» ՓԲԸ վարչության նախագահ, տնօրեն Հրանտ Թադևոսյանը։
«1000 մարդ ինձ մոտ չի վճարվելու հանձնաժողովի նշած տարիֆով։ Այսինքն հուլիսի 19-ին պետք է ունենամ 1000 հոգու կրճատում, որպեսզի ֆինանսական դիսցիպլինան չխախտեմ։ Իմ և հանձնաժողովի միջև տարաձայնությունը դրանում է, որ ես գտնում եմ, որ աշխատանքները պետք է ամբողջությամբ կատարվեն։ Ո՞ր 1000 հոգուն կրճատեմ, որ ավելորդ են»,-ասաց Հրանտ Թադևոսյանը։
Դիտարկմանը, որ կան խոսակցություններ, որ կրճատումները սովորաբար վերաբերում են ամենախոցելի աշխատողներին, տեսուչներին են հեռացնում, «Գազպրոմ Արմենիա»-ի տնօրենն ասաց. «Ես անձամբ, ելնելով այս խնդրից, մոտ 15 օր առաջ նամակ եմ ուղարկել «Գազպրոմ»-ի ղեկավարությանը իմ աշխատավարձը պակասեցնելու համար։ Խնդրել եմ նվազեցնել իմ աշխատավարձը, որպեսզի ինքս նույնպես զգամ այն բեռը, որը զգալու են բոլորը։ Պաշտոնապես նամակն ուղարկել եմ և սպասում եմ պատասխանին։ 2 մլն դրամից ավել աշխատավարձ ստացող մյուս 10 աշխատակիցները աշխատավրձն իջեցնելում եմ իմ հրամանով։ Բոլոր աշխատողներն էլ կզգան, խնդիրներ կունենան։ Առաջին մեծաքանակ կրճատումը, որը տեսնում եմ 1000-ի մեջ, հսկիչներն են։ Նման որոշում կայացվել է և ոչ թե ես եմ որոշել, այլ ՀԾԿՀ-ն իր գազամատակարարման օգտագործման կանոնների մեջ դեռ անցյալ տարի որոշում ընդունեց և սահմանեց։ Մեկ տարի է չէի անում, այսօր չեմ կարող։
Նշանակում է՝ հսկիչի գործը երկու անգամ պակասեցվել է։ Այսինքն օրենքով նման աշխատանքի պահանջարկ չկա, դրա համար ենթադրում ենք, որ 50 տոկոսով հսկիչները կրճատվելու են, մոտ 700-800 հսկիչ»,-ասաց Հրանտ Թադևոսյանը։