Առաջին խմբում հանդես եկող թիմերից այս անգամ «Fair-Play»-ն անդրադարձել է Երևանի «Անիին»
«0։7, 0։8, 2։9 և վերջապես 0։12․ նման հաշիվները հազվադեպ են արձանագրվում նույնիսկ տափօղակով հոկեյում։ 25 խաղում «Անին» խփել է 30 և բաց թողել 86 գնդակ։ 17 թիմերի պայքարում Երևանյան թիմը 21 միավորով 13-րդն է։
Եթե մեր նախորդ թողարկումներում խոսվում էր ակումբների մասին, որոնց սեփականատարերի մասին բավական կասկածելի տեղեկություններ կան, ապա Անիի դեպքում հիմնադիրը և միակ սեփականատերը հայտնի է բոլորին: Խոսքը լեգենդար Խորեն Հովհաննիսյանի մասին է: 20-րդ դարի Հայաստանի լավագույն ֆուտբոլիստը ակումբի նախագահն է, իսկ որդին’ Ժորա Հովհաննիսյանը, Անիի փոխնախագահն է:
Ակումբը հիմնելուց հետո լեգենդար ֆուտբոլիստը կոչ էր արել 16-21 տարեկան հայ ֆուտբոլիստներին միանալ «Անիին», խոստանալով իր փորձը, գիտելիքներն ու հմտությունները փոխանցել նրանց։ Հիմնադրվելուց և իրավաբանական անձանց ռեգիստրում գրանցվելուց անմիջապես հետո «Անին» Առաջին խմբի առաջնությանը մասնակցելու իրավունք էր ստացել և դարձել նաև ՀՖՖ-ի անդամ։ Ավելին, Խորեն Հովհաննիսյանն իր թեկնածությունն էր առաջադրել անցյալ տարվա դեկտեմբերին տեղի ունեցած Հայաստանի ֆուտբոլի ֆեդերացիայի նախագահի ընտրություններում։ Ավելի ուշ, Հովհաննիսյանը դուրս եկավ ընտրապայքարից պաշտպանելով ՀՖՖ-ի ներկայիս նախագահ Արմեն Մելիքբեկյանի թեկնածությունը։ Այսօր Հովհաննիսյանը զբաղեցնում է ՀՖՖ-ի նախագահի խորհրդականի պաշտոնը։
Հիմնադրումից որոշ ժամանակ անց հայտնի դարձավ, որ «Անիի» հովանավորն է լինելու «Վիվարո» բուքմեյքերական ընկերությունը, որի տարբերանշանկը առկա է թիմի մարզաշապիկին։ Թիմի գլխավոր մարզչի պաշտոնն էլ զբաղեցնում է նախկինում ճանաչված ֆուտբոլիստ Անդրանիկ Հովսեփյանը։ Լեգենդար անձը նախագահի պաշտոնում, հարուստ հովանավոր… այս ամենը թույլ էր տալիս ենթադրել, որ ստեղծվում է Հայաստանի չափանիշներով բավական սոլիդ մի ակումբ, սակայն սպասելիքները ոչ միայն չարդարացան, այլև առաջ եղան մի շարք հարցեր:
Տրանսֆերմարկետ պարբերականի համաձայն «Անիում» հայտավորված են միանգամից 40 ֆուտբոլիստներ, որոնցի 8-ը լեգեոներներ են։ Ընդ որում նրանցից 6-ը Ռուսաստանից են, Ուդուկ Էգեչեկուաման՝ Նիգերիայից, իսկ Վալդո Ժունիոր Բիլունգան՝ Կամերունից։ Եթե Բիլունգայի վերաբերյալ համացանցում որոշակի տեղեկություններ կան և հայտնի է, որ նա «Անի» է տեղափոխվել կամերունական «Նյու Սթար» ակումբից, ապա Էգեչեկուամայի մասին որևէ տեղեկություն գտնել չհաջողվեց։ Նշվում է միայն, որ «Անին» նրա առաջին ակումբն է։ Նշենք նաև, քիչ չեն նաև տեղացի ֆուտբոլիստները, որոնց համար «Անին» առաջին ակումբ է։
Այժմ անդրադառնանք, «Անի» մասնավորապես ոչ ֆուտբոլային հաշիվներով պարտություններին և հակառեկորդներին։Առաջին խմբի մեկնարկային տուրում «Անին» 0:7 հաշվով զիջել էր «Ուրարտու»-2-ին։ Այս մրցավեճի առաջին խաղակեսում 0։3 հաշվով զիջելուց հետո, երկրորդ կեսում «Անին» բաց էր թողել 4 գնդակ։ Արդեն երկրորդ շրջանի առաջին տուրում «Անին» նույն «Ուրարտու»-2-ին զիջել է արդեն 0։12 հաշվով։ Ընդ որում այս հանդիպման առաջին խաղակեսն ևս ավարտվել է 0։3 հաշվով։ Հանդիպման 51-87-րդ րոպեների կամ ընդամենը 36 րոպեների ընթացքում «Անին» սեփական դարպասն է ընդունել 9 գնդակ։ Փաստորեն, ընթացիկ առաջնության երկու հանդիպումների արդյունքում «Անին»՝ «Ուրարտու»-2-ին զիջել է 0։19 հաշվով։ Նկատենք, որ Ուրարտուում ևս հանդես են գալիս երիտասարդ խաղացողներ: Եթե ավելի խորը հայացք նետենք վիճակագրությանը կստացվի, որ երկրորդ խաղակեսերի կտրվածքով «Անին»՝ «Ուրարտուին» զիջել է 0։14 հաշվով։
Հանուն արդարության նշենք, որ Անիում լեգեոներներ հայտնվել են ձմեռային տրանսֆերային պատուհանի ընթացքում: Արտասահմանցիների գալուց հետո Անին պետք է, որ ավելի լավ արդյունքներ գրանցեր, սակայն պատկերը չի փոխվել, որի վառ ապացույցը այս տարվա հունիսի 4-ին «Արարատ-Արմենիա»-2-ի հետ խաղն է։ Այս մրցավեճում Անին զիջել է ոչ ֆուտբոլային 2:9 հաշվով: Ի դեպ, հանդիպման հաշիվը բացել է հենց «Անին», իսկ առաջին կեսն ավարտվել 2։1 հաշվով հօգուտ «Արարատ-Արմենիա-2-ի։ Երկրորդ կեսում 51-90-րդ րոպեների ընթացքում «Անին» բաց է թողել 7 գնդակ։ Պետք է ընդգծել, որ Արարատ-Արմենիայի դուստր թիմը հանդես եկել բացառապես տեղացի խաղացողներով և առաջին խմբի 6-րդ տեղում է:
Վիճակագրության համաձայն առաջին խմբի առաջնությունում «Անին» արդեն իսկ կրել է խոշոր հաշվով 8 պարտություն։ Բացառությամբ ԲԿՄԱ-ի հետ հանդիպման մյուս 7 խաղերում «Անին» գոլերի մեծ մասը բաց է թողել երկրորդ խաղակերում։ Օրինակ, այս տարվա հունիսի 6-ին տեղի ունեցած «Լոկոմոտիվի» հետ հանիպումը, որն ավարտվել է 1։5 հաշվով, առաջին կեսում «Անին» զիջել էր 1։2 հաշվով։ Հանդիպման 77-85-րդ րոպեների ընթացքում Անդրանիկ Հովսեփյանի թիմը բաց է թողել 3 գնդակ։
ԲԿՄԱ-ի հետ խաղում «Անին» պարտություն է կրել 0։8 հաշվով։ Այս դեպքում միայն«Անին» ավելի շատ գնդակ է բաց թողել առաջին կեսում, զիջելով 0։6 հաշվով։ Ընդ որում 6 գնդակները «Անին» սեփական դարպասն է ընդունել 1-28-րդ րոպեների ընթացքում։ Վիճակագրական տվյալները ոչ միայն անտրամաբանական այլև կասկածելի են թվում, քանի որ Անիի մասնակցությամբ մի շարք այլ խաղեր անցել են համառ պայքարում, իսկ երբեմն նաև գրանցվել են դրական արդյունքներ: Օրինակ վերջին երկու հանդիպումներում «Անին» նույնքան հաղթանակ է տարել 5։3 հաշվով առավելության հասնելով «Արարատ-»-2-ի և 3։2 հաշվով «Արագածի» նկատմամբ։
Սա խոսում է այն մասին, որ 8 լեգեոներներով և տեղացի երիտասարդ կադրերով համալրված «Անին» այդքան էլ թույլ չէ որքան թվում է։ Նույն «Արագածն» այսօր մրցաշարային աղյուսակի 10-րդ հորիզոնականում է, իսկ «Արարատ-2»-ն 9-րդն է։ Դեռևս առաջին շրջանում «Անին» հաղթել էր նաև 4-րդ տեղում գտնվող «Սևանին»։
Նշենք, որ «Վիվարոն» հնդիսանալով «Անիի» հովանավորը խաղադրույքներ չի ընդունում այս թիմի մասնակցությամբ հանդիպումների վրա։ Վերջին մեկ ամսում «Անի» մասնակցությամբ հանդիպումներն ընդգրված չեն նաև հեղինակավոր բուքմեյքերական ընկերությունների ծրագրերում»։