Ռոբերտ Քոչարյանի խափանման միջոցի փոփոխության վերաբերյալ դատարանի որոշումը, ըստ որի՝ նա կարող է ազատ լինել 2 միլիարդ դրամ գրավի դիմաց, Հայաստանում փոթորկել է հանրային դաշտը և միաժամանակ կարող է նոր իրավիճակ ստեղծել քաղաքական դաշտում: Իհարկե, այստեղ շատ բան կախված է այն հանգամանքից, թե արդյոք ի վերջո կվճարի՞ գրավը Ռոբերտ Քոչարյանը, ու նաև՝ թե արդյոք դատարանը կբավարարի՞ Գագիկ Ծառուկյանի կալանքի միջնորդությունը, որի հարցը քննարկվում է արդեն երեք օր: Եթե Ռոբերտ Քոչարյանը հայտնվի ազատության մեջ, ապա իհարկե, անկախ Ծառուկյանի խափանման միջոցից, դաշտում կձևավորվի նոր հարաբերակցություն:
Ռոբերտ Քոչարյանը հայտարարել է իր քաղաքական հավակնության մասին, ընդ որում՝ այնպիսի տոնայնությամբ, որ բավականին դժվար կլինի հրաժարվել դրանից կամ հրաժարվել դրանից արագ: Մյուս կողմից՝ անկասկած է, որ այդ հավակնությունն իրացնելու համար նրանից պահանջվում է գործիքակազմ, մասնավորապես քաղաքական ձևաչափ կամ այլ կերպ ասած՝ կուսակցություն, քաղաքական նախաձեռնություն, դաշինք: Նրա որդին՝ Լևոն Քոչարյանը, ամիսներ առաջ չէր հերքել, որ հնարավոր է ստեղծեն նոր կուսակցություն: Երկրորդ նախագահը կա՛մ պետք է գնա այդ ճանապարհով, կա՛մ պետք է իր աջակցությունը հայտնի որևէ՝ արդեն գոյություն ունեցող քաղաքական ձևաչափի, որը հավակնում է աշխույժ մասնակցություն ունենալ ներքին կյանքում և պայքարել որևէ դիրքի համար:
Այդպիսով, Ռոբերտ Քոչարյանն ազատության մեջ պետք է լուծի քաղաքական դիրքավորման հարցը, որը կարող է որոշակիորեն շրջանցել՝ գտնվելով անազատության մեջ և գերակա խնդիր դիտարկելով խափանման միջոցի փոփոխության հարցը: Երբ այդ հարցը լուծվի, ապա, հաշվի առնելով նրա քաղաքական հայտը, կառաջանա կամ առաջին պլան կգա քաղաքական դիրքավորման հարցը, առավել ևս՝ ԲՀԿ շուրջ ստեղծված իրադրությամբ ներկայիս թեժ մթնոլորտում:
Քաղաքական դիրքավորումը եղել է այն, ինչի առաջ Ռոբերտ Քոչարյանը կանգնել է իր հետնախագահական ամբողջ շրջանում, բայց այդպես էլ չի գնացել այդ հարցին հստակ պատասխան տալու քայլին, չի ստանձնել այդպիսի պատասխանատվություն:
Բայց նոր իրավիճակում դա կլինի շատ բարդ, գուցե անհնար. երկրորդ նախագահը պետք է դիրքավորվի: Այստեղ, եթե նա ստեղծի իր քաղաքական ուժը, ապա դրա հանդեպ շատ հստակ դիրքավորման անհրաժեշտություն կառաջանա մյուս ուժերի մոտ, այն բոլոր ուժերի, որոնք մրցում են ընդդիմության առաջատար տեղի համար: Կամ երկրորդ նախագահը պետք է միանա նրանց՝ ուժերի, որոնք, համենայնդեպս մինչ այժմ, արել են ամեն ինչ՝ նրա հետ ասոցիացիան հերքելու կամ մերժելու համար:
Այդպիսով ակնառու է, որ հայտնվելով ֆիզիկական ազատության մեջ՝ Ռոբերտ Քոչարյանը քաղաքական իմաստով կարող է հայտնվել իր համար ավելի անազատ ռեժիմում կամ իր քաղաքական հավակնությամբ սահմանափակել այլ ուժերի ազատ տարածությունը՝ նեղացնելով նրանց մանևրի դաշտը:
Ակնառու է, որ դատարանի իրավական որոշումը ուղղակի թե անուղղակի կազմում է Հայաստանում առանցքային փուլ մտած քաղաքական բազմաքայլ և բազմաշերտ խաղի էական դրվագներից մեկը:
Լուսանկարը՝ Armeniasputnik-ի
