Նախօրեին Ազգային ժողովը բավարարեց գլխավոր դատախազի միջնորդությունը Գագիկ Ծառուկյանի նկատմամբ քրեական հետապնդում իրականացնելու և ազատությունից զրկելու վերաբերյալ: ԲՀԿ-ն սա քաղաքական հետապնդում է համարում, իսկ իշխանությունը հակառակն է պնդում: Թեմայի շուրջ «Առաջին լրատվական»- ի հետ զրույցում դերասան, քաղաքական սատիրիկ Սերգեյ Դանիելյանն իր մեկնաբանությունները ներկայացրեց վերջին շրջանում տեղի ունեցած ներքաղաքական իրադարձությունների շուրջ:
«Այն, ինչ տեղի է ունենում, վաղուց պետք է տեղի ունենար: Պարզ էր, որ չպետք է ընդհանրապես կապ ունենալ որևէ հին քաղաքական դաշինքի կամ կուսակցության հետ, բայց հեղափոխությունը սկզբից սխալ գնաց. մենք պետք է մեր վարչապետին ընտրեինք հենց փողոցում՝ բոլոր ուժերին դուրս թողնելով: Բայց թե այդպես որոշվեց. Փաշինյանը որոշեց դաշինք կնքել ԲՀԿ-ի հետ, բայց հետո հիշեց, որ այնքան էլ լավ տղա չէ Գագիկ Ծառուկյանը: Այս ամեն ինչը պետք է վաղուց լիներ և ավելի մարդավարի լիներ»,- նշեց Սերգեյ Դանիելյանը:
Որքանո՞վ են ուշացած իշխանության այս քայլերը, ոմանց մոտ լեգիտիմ հարց է առաջանում, թե ինչու միայն ԲՀԿ-ն, չէ՞ որ ընտրությունները կեղծել են նաև ՀՀԿ-ն և այլ ուժեր: Անդրադառնալով այս դիտարկմանը՝ դերասանը նշեց. «Մենք ընտրել ենք տանջալից ճանապարհ՝ ամեն տարի մի բան բացահայտելով, հետո կբացահայտվի, որ ՀՀԿ-ն էլ ունի նման կոմպրոմատներ, որ կան վարկաբեկող սյուժեներով տեսանյութեր և այլն: Հենց սկզբից պետք է բոլորին ռադ անեին ու պրծնեին, և չքչփորեին ու ամեն անգամ «նոր ամերիկա» բացահայտեին: Ինձ համար բոլոր հին կուսակցություններն էլ նույն աղբն են՝ լինի ՀՀԿ-ն, ԲՀԿ-ն, թե ՀՅԴ-ն: Այս ընթացքում կարելի էր դատական համակարգը փոխել… Գործ անելու փոխարեն մենք զբաղված ենք հողմաղացների հետ կռիվ անելով, հին մեռելներին բարձրացնելով ու հիշելով նրանց կեղտոտ կենսագրությունը, այնինչ մենք այդ կենսագրությունը շատ լավ գիտենք, և այս ամենը մեզ նյարդայնացնում է: Ժողովրդին նյարդայնացնում է այն, որ վաղուց հերները չեն անիծել: Ոնց որ հունվարի 2-ին տոնածառ գնես, եթե հունվարի 1-ի գիշերը տոնածառ չես դրել, էլ դրանից հետո ո՞ւմ է պետք»:
«Ծառուկյան երույթը բավականին վախկոտ է և խարխուլ… Բազմիցս տեսել ենք, թե ոնց է առյուծը դառնում կատու: Ծառուկյանի այսօրվա խրոխտ բառամթերքը գալիս է նրանից, որ նա մեջք ունի, իսկ նրա մեջքը չի կարող լինել որևէ քաղաքական դիակ, Ռուսաստանն է թևեր տվել, իսկ Ռուսաստանը բազմաշերտ է…»,- ընդգծեց Սերգեյ Դանիելյանը:
Մանրամասն՝ տեսանյութում:
