Երեկ ՈւԵՖԱ-ի շտաբ բնակարաում, կայացավ ՈՒԵՖԱ Գործադիր կոմիտեի հեռավար նիստը, որի ընթացքում քննարկվեցին ՈՒԵՖԱ-ի կողմից կազմակերպվող ինչպես ակումբային այդպես էլ ազգային հավաքականների մրցաշարերի ձևաչափերի փոփոխությունները և անցկացման նոր ժամկետները։ Հիշեցնենք, որ այս տարվա աշնանը Հայաստանի ազգային հավաքականը սկսելու է պայքարը Ազգերի լիգայի խաղարկությունում, որտեղ տեսական հնարավորություն կա պայքարելու 2022 թվականի աշխարհի առաջնության եզրափակիչ փուլի ուղեգրի համար։ Եվ այսպես, ՈւԵՖԱ-ի որոշմամբ Ազգերի լիգայի որակավորման փուլի սեպտեմբեր-նոյեմբերին նախատեսված մրցաշարի ժամկետներում փոփոխություններ չեն լինելու: Առաջին տուրի հանդիպումները պետք է կայանան սեպտեմբերի 3-8-ը, երկրորդը` հոկտեմբերի 11-14-ը, երրորդը` նոյեմբերի 14-18-ը: Հավաքականները կարող են ընկերական հանդիպումներ անցկացնել հոկտեմբերի 7-8-ին և նոյեմբերի 11-12-ին:
Ըստ այդմ Հայաստանի հավաքականի առաջիկա հանդիպումը կկայանա սեպտեմբերի 5-ին՝ Հյուսիսային Մակեդոնիայի հետ՝ մրցակցի հարկի տակ, իսկ սեպտեմբերի 8-ին մեր թիմը Երևանում ընդունելու է Էստոնիային: Դեռևս մարտի 3-ին Նիդերլանդների Ամստերդամ քաղաքում կայացել էր Ազգերի լիգայի 2020/21 մրցաշրջանի խմբային փուլի վիճակահանությունը: Հայաստանի ընտրանին ընդգրկվել էր C ենթախմբի երկրորդ խմբում Վրաստանի, Հյուսիսային Մակեդոնիայի և Էստոնիայի թիմերի հետ: Ավելի վաղ, The Independent-ը տեղեկություն էր տարածել, որ Ազգերի որակավորման փուլի խաղերը կարող են հետաձգվել կորոնավիրուսի համավարակի պատճառով: Ինչևէ, ՈւԵՖԱ-ի երեկվա նիստից հետո կարող ենք արձանագրել, որ իսպանացի մասնագետ Խոակին Կապառոսի նորամուտի խաղը Հայաստանի ազգային հավաքականում կկայանա այս տարի, սեպտեմբերի 5-ին Հուսիսային Մակեդոնիայի մայրաքաղաք Սկոպիեյում։
Կապառոսի գլխավորությամբ մեր հավաքականն առաջին հանդիպումը պետք է անցկացներ այս տարվա մարտին։ Մասնավորապես, մարտի 26-ին մեր գլխավոր թիմը Տաշքենդում պետք է ընկերական հանդիպում անցկացներ Ուզբեկստանի, իսկ մարտի 30-ին՝ Ղազախստանի հետ։ Այդ հանդիպումները հնարավորություն էին մեր մարզչի համար ծանոթանալու ֆուտբոլիստներին, սկսելու քայլերը խաղային մոդել ձևավորելու գործընթացում։ Նախատեսվում էր, որ մեր հավաքականը ընկերական հանդիպումներ կանցկացներ նաև մայիս և հունիս ամիսներին։ Այդ ժամանակահատվածում Եվրոպայի առաջնության մասնակից հավաքականները բազմաթիվ ստուգողական հանդիպումներ պետք է անցկացնեին մրցաշարին նախապատրաստվելու համար։ Դա լավ հնարավորություն էր Կապառոսի և մեր հավաքականի համար մրցելու ուժեղ մրցակիցների հետ։ Կորոնավիրուսի համավարակի պատճառով ՈՒԵՖԱ-ն մեկ տարով հետաձգեց նաև Եվրո-2020-ը։ Սա նշանակում է, որ Հայաստանի ազգային հավաքականը մինչև պաշտոնական մրցաշարը ստուգողական խաղ չի անցկացնի։ Նշենք նաև, որ Կապառոսը դեռևս հնարավորություն չի ունեցել առերես ծանոթանալու մեր հավաքականի ֆուտբոլիստների հետ։ Ամեն դեպքում, մեր հավաքականի ըստ էության նոր գլխավոր մարզիչը այս ընթացքում կատարել է լայնածավալ տեսական աշխատանք։ «Ես իմ օրվա 24 ժամը տալիս եմ Հայաստանի ընտրանուն, և իմ օգնականները ինձ են տալիս այն ֆուտբոլիստների տեսանյութերը, որոնք դեռևս հանդես չեն եկել ընտրանու կազմում: Մինչ Հայաստանի թիմի մարզիչ նշանակվելս արդեն իսկ խոսել էի Մխիթարյանի հետ: Նա Հայաստանի ֆուտբոլիստի իսկական օրինակ է ծառայում: Նա օժտված է նաև մարդկային լավ որակներով»,-ասել էր մարզիչը: Այս ընթացում Կապառոսը կապ է հաստատել մի շարք ֆուտբոլիստների հետ, ովքեր չեն հրավիրվել հավաքական։
News.am Sport-ը երեկ տեղեկություն էր տարածել, որ Հայաստանի հավաքականի գլխավոր մարզչի տեսադաշտում է հայտնվել հայկական արմատներ ունեցող արգենտինացի փլեյմեյքեր Լուկաս Սելարայանը: Նշվում է, որ Կապառոսն արդյունավետ զրույց է ունեցել 27-ամյա ֆուտբոլիստի հետ, որը հունվարին համալրել է ՄԼՍ-ը ներկայացնող Columbus Crew ակումբի կազմը և արդեն հասցրել է բացել իր գոլերի հաշիվը նոր առաջնությունում: Սելարայանի տրանսֆերն ամերիկյան ակումբին արժեցել է 7 միլիոն դոլար, ինչը տրանսֆերային ռեկորդ է համարվում Columbus Crew-ի համար: Լուկաս Սելարայանը կարիերան սկսել է արգենտինական «Բելգրանո» ակումբում, 2016 թվականին տեղափոխվել է մեքսիկական «Տիգրես», որի կազմում 2 անգամ դարձել է Մեքսիկայի չեմպիոն:Վերոնշյալ ակումբների կազմում հայկական արմատներով արգենտինացի կիսապաշտպանն անցկացրել է ավելի քան 200 պաշտոնական հանդիպում, դարձել 34 գոլի ու 20 արդյունավետ փոխանցման հեղինակ: Նույն աղբյուրի համաձայն մեր հավաքականը կհամալրի նաև Գյումրիի «Շիրակի» նիգերիացի հենակետային կիսապաշտպան Սոլոմոն Իմե Ուդոն։
Հայաստանի ֆուտբոլի ֆեդերացիայի ներկայացուցիչներն արդեն բանակցել են 24-ամյա ֆուտբոլիստի հետ, որը Հայաստանում հանդես է գալիս 2015թ․ մայիսից և Ֆուտբոլի միջազգային ֆեդերացիայի կանոններով՝ 5 տարի նույն երկրում հանդես գալուց հետո ունի ֆուտբոլային քաղաքացիությունը փոխելու հնարավորություն։Սոլոմոն Իմե Ուդոն 2015-ին բելգիական «Էյպենից» էր տեղափոխվել Երեւանի «Արարատ»։ Հետագայում նիգերիացի կիսապաշտպանը հանդես է եկել «Ուլիսում», «Ուրարտուում» և «Շիրակում», որի կազմում անցկացրել է 100-ից ավելի հանդիպում։ Ռուսաստանում ԵԱՏՄ երկերների ֆուտբոլիստների լեգեոներ չհամարվելու օրենքի ընդունումից հետո մեր հավաքականը կհամարվի ևս մի քանի նոր ֆուտբոլիստներով։ Մասնավորապես, Կապառոսը արդեն իսկ համաձայնության է եկել «Խիմկիի» կիսապաշտպան Արշակ Կորյանի հետ։ Հավանականությունը մեծ է նաև, որ Հայաստանի հավաքականում կխաղա նաև «Ռոստովի» կիսապաշտպան Խորեն Բայրամյանը։
Մնում է հուսալ, որ Կապառոսի փորձն ու բարձր որակները թույլ կտան առանց ստուգողական հանդիպումների Ազգերի լիգայի խաղարկությունում տեսանելի առաջընթաց և գոնե բավարար արդյունք ապահովել։