«Առաջին լրատվական»-ի տեղեկություններով՝ արդեն իսկ պատրաստ է ՍԴ ճգնաժամը հաղթահարելու վերաբերյալ Վենետիկի հանձնաժողովի դիրքորոշումը։
Հիշեցնենք, որ ավելի վաղ, երբ որոշում կայացվեց՝ պանդեմիայով պայմանավորված, ՍԴ ճգնաժամը լուծել ոչ թե հանրաքվեի, այլ ԱԺ-ի միջոցով, արդարադատության նախարար Ռուստամ Բադասյանը հայտարարեց, որ դիմել են Վենետիկի հանձնաժողովին լուծման այդ ճանապարհի վերաբերյալ դիրքորոշում ստանալու համար։ Եվ ահա այդ դիրքորոշումն արդեն պատրաստ է։ Եվ, չնայած Վենետիկի հանձնաժողովը մշտապես զգուշավոր դիրքորոշումներ է ներկայացրել դատավորների անկախության և անփոփոխելիության հետ կապված պետությունների նախաձեռնությունների դեպքերում։ Ավելին, սա այն մարմինն է, որը հենց ինքն է սահմանում և խրախուսում այդ չափանիշները։ Թերևս սա էր պատճառը, որ շատ իրավաբաններ, այդ թվում՝ նախկին և ներկա ՀՀԿ-ական «իրավական» շրջանակներ ու նրանց մանր ու մեծ խոսնակներ, գուժում էին, որ բացառված է, որ Վենետիկի հանձնաժողովը դրական եզրակացություն տա ՍԴ ճգնաժամի հաղթահարման վերաբերյալ իշխանությունների առաջարկությանը։
Սակայն մեզ հասած հավաստի տեղեկություններով՝ վաղվա նիստում Վենետիկի հանձնաժողովը հաստատելու է մի կարծիք, ըստ որի՝ հանձնաժողովն ընդունելի է համարում իշխանությունների՝ ՍԴ մոդելը կյանքի կոչելու առաջարկությունը և նշելու է, որ դա համապատասխանում է եվրոպական չափանիշներին։ Ըստ այդմ, Վենետիկի հանձնաժողովն ընդունելի է համարել իշխանությունների առաջարկությունը, ըստ որի՝ 12 տարուց ավելի պաշտոնավարած դատավորների լիազորությունները պետք է դադարեցվեն, պետք է ընտրվի ՍԴ նոր նախագահ, ինչպես դա սահմանված է Սահմանադրության 2015 թվականի փոփոխություններով։
Հանձնաժողովը դրական կարծիք է արտահայտել նաև Ազգային ժողովի՝ նախապես հայտարարված հանրաքվեն չեղարկելու հնարավորությանը և Սահմանադրական դատարանի կողմից Սահմանադրության փոփոխությունների նախնական քննության շրջանակի հստակեցման հարցերի վերաբերյալ։
Մեր աղբյուրների պնդմամբ՝ Վենետիկի հանձնաժողովում այս ընթացքում հասկացել են, թե ինչ քաղաքական և անձնական շահերով է առաջնորդվում Սահմանադրական դատարանը, ուստի, այդ պատճառով է, որ հանձնաժողովի կարծիքում խիստ գնահատականներ և նախազգուշացումներ են ներառվել՝ ուղղված Սահմանադրական դատարանին և դրա նախագահին, ինչպես նաև բավականին թափանցիկ կերպով անդրադարձ կա Հրայր Թովմասյանի՝ նախագահի պաշտոնում նշանակվելու գործընթացի կասկածելիության վերաբերյալ։
Ըստ մեր տեղեկությունների, նույն նիստի ընթացքում հաստատվելու է ՍԴ դիմումի հիման վրա Վենետիկի հանձնաժողովի կողմից իրականացված համեմատական վերլուծությունը ՀՀ Քրեական օրենսգրքի 300.1 հոդվածի վերաբերյալ։ Ասում են, որ հանձնաժողովն ըստ էության եզրակացրել է, որ 300.1-րդ հոդվածը որևէ խնդիր չունի իրավական որոշակիության առումով, և ԵԽ երկրների մեծ մասում հենց նույնանման ձևակերպումներ են օգտագործվում քրեական այդ երևույթի դեպքում:
Հիշեցնենեք, որ արդարադատության նախարար Ռուստամ Բադասյանը Վենետիկի հանձնաժողովին երեք իրավական հարց էր առաջադրել, որոնք վերաբերում էին 2015 թվականի սահմանադրական փոփոխություններով նախատեսված, սակայն չիրագործված Սահմանադրական դատարանի նոր մոդելի իրագործմանը, Սահմանադրական դատարանի կողմից Սահմանադրության փոփոխությունների նախնական քննության շրջանակի հստակեցմանը և այդ քննության ժամկետին, ինչպես նաև Ազգային ժողովի՝ նախապես հայտարարված հանրաքվեն չեղարկելու հնարավորությանը, որը կասեցվել է համավարակի պատճառով հայտարարված արտակարգ դրության հիմքով։