Ինչպես տեղեկացնում է Newsgeorgia.ru-ն, Եվրախորհրդարանի նախագահ Եժի Բուզեկը երեկ հայտարարել է, որ Վրաստանի նախագահ Միխեիլ Սաակաշվիլիի նախաձեռնությունը, որը հնչեց Եվրախորհրդարանի ամբիոնից, շատ կարևոր հայտարարություն էր Աստանայում կայանալիք ԵԱՀԿ գագաթնաժողովի նախաշեմին. «Սա չափազանց կարևոր և բացարձակապես նոր առաջարկ է: Այժմ մենք սպասում ենք Ռուսաստանի արձագանքին», – նշել է Բուզեկը: Նրա խոսքով` ԵՄ-ը և անձամբ ինքը պատրաստ են Վրաստանի և Ռուսաստանի միջև բանակցությունների կողմ դառնալ, նրա խոսքով` «դա կարևոր է Եվրոպայի և ամբողջությամբ Կովկասի համար»: «Ես հավատում եմ, որ նախագահ Մեդվեդևը բաց կլինի նշյալ խնդիրների կարգավորման հարցում»,- նշել է Եվրախորհրդարանի նախագահ Եժի Բուզեկը:
Վրաստանը կարող է լինել դրական մոդել, թե ինչպես են տեղի ունենում գործընթացները ժողովրդավարական հասարակության մեջ, նշել է Բուզեկը` եվրախորհրդարանականներին ներկայացնելով Վրաստանի նախագահ Միխեիլ Սաակաշվիլիին: «Եվրամիությունն ուշադիր հետևում է Վրաստանում տեղի ունեցող գործընթացներին: Կատարված փոփոխությունները շատ կարևոր են ոչ միայն Վրաստանի, այլև ամբողջ Հարավային Կովկասի համար»,- ասել է Բուզեկը: «Չնայած Վրաստանի ժողովրդավարական զարգացմանը` բարեփոխումներ են անհրաժեշտ տարբեր ոլորտներում»,- ասել է Եվրախորհրդարանի ղեկավարը` հավաստելով օգնություն ցուցաբերելու Եվրամիության պատրաստակամությունը: «Մեզ կայունություն է հարկավոր ամբողջ Հարավային Կովկասում»,- շեշտել է նա:
