Հայաստանը միացել է 2020թ. փետրվարին ձևավորված Կրոնական ազատության միջազգային դաշինքին։ ՀՀ արտաքին գործերի նախարարության մամուլի ծառայությունից տեղեկացնում են, որ դաշինքի կազմում ներկայում 29 երկիր կա:
«Որպես մարդու իրավունքների ջատագով՝ Հայաստանը մեծապես կարևորում է կրոնի ազատությունը՝ որպես մարդու անօտարելի իրավունք»,- նշված է պաշտոնական հաղորդագրության մեջ։ Հայաստանի Արտաքին գերատեսչությունը ընդգծում է, որ այս դաշինքին միանալով՝ Հայաստանը վերահաստատում է իր հանձնառությունը՝ կրոնական խմբերի հանդեպ հանդուրժողականության ամրապնդման և կրոնական հիմքով պայմանավորված ոտնձգությունների կանխարգելման ուղղությամբ գործադրվող համատեղ ջանքերին:
Նշենք, որ ամիսներ առաջ ձևավորված դաշինքի անդամ երկրների թվում են ԱՄՆ-ը, Ավստրիան, Վրաստանը, Իսրայելը, Լատվիան, Լիտվան, Էստոնիան, Լեհաստանը, Նիդեռլանդները, Չեխիան և այլն։
Հիշյալ ալիանսին միանալու Հայաստանի որոշումը սակայն միանշանակ ընկալում չի ստացել։ Հայաստանի քաղաքագետները մտահոգություն են հայտնում, քանի որ դաշինքն ըստ էության ստեղծվել է ԱՄՆ-ի կողմից և եղած հայտարարություններից կարելի է դատել, որ այն ունի հստակ հակաչինական բնույթ։
Ամերիկագետ Սուրեն Սարգսյանն իր ֆեյսբուքյան էջի գրառմամբ օրինակ է մեջբերել։ Ներկայացնենք դրանցից մեկը.«ԱՄՆ պետքարտուղար Պոմպեոյի այնպիսի հայտարարությունները, ինչպիսիք են. «Ղազախստանում ես հանդիպեցի Չինական Կոմունիստական կուսակցության կողմից Սինցզյանում ձերբակալված էթնիկ ղազախների ընտանիքներին», կամ «մենք դատապարտում ենք Չինաստանի Կոմունիստական կուսակցության թշնամանքը բոլոր հավատքների նկատմամբ: Մենք գիտենք, որ ձեզանից մի քանիսը քաջաբար ետ են մղել չինական ճնշումները՝ համաձայնելով մաս կազմել այս Ալիանսին, և մենք շնորհակալություն ենք հայտնում դրա համար»»:
Սուրեն Սարգսյանը նաև ուշագրավ է համարում այն հանգամանքը, որ եթե 2020 թվականի նոյեմբերին Թրամփը պարտվի, ապա այս Ալիանսի ապագան մշուշոտ է դառնում.«Ինչու՞ էր ընդհանրապես պետք մինչև նոյեմբեր «ափալ-թափալ» մեզ «մեջ գցել» գիգանտների մեծ կռվի մեջ ու չինացիների հետ լարվել: Լարվում էիք, գոնե նոյեմբերից հետո լարվեիք, որ դիմացներդ 4 տարի «երաշխավորված» ակնկալիք ունենաիք:Եվ դեսերտը, Ռուսաստանի դիրքորոշումը. «Կրոնական ԱզատությանԱլիանսը, որը ստեղծել է Միացյալ Նահանգները, կարող է պարտադրել ամերիկյան արժեքները ամբողջ աշխարհին և դաշինքի կողմից արված ազատության մակարդակի գնահատականները կլինեն քաղաքականացված, քանի որ սա կրոնական միավորում չէ»»,- գրել է Սարգսյանը։
Թեմայի շուրջ զրուցել ենք հենց Սուրեն Սարգսյանի հետ: