Վրաստանի կառավարությունը որոշել է վայրերը, որտեղ պաշտպանիչ դիմակ կրելը պարտադիր է: Այս մասին հաղորդել է կառավարության աշխատակազմի ղեկավար Նատիա Մեզվրիշվիլին:
Անհրաժեշտ է դիմակ կրել հասարակական տրանսպորտում, ընդհանուր օգտագործման վերելակներում, առևտրի օբյեկտներում, գեղեցկության սրահներում և գեղագիտական բժշկության կենտրոններում, պետական և մասնավոր հաստատությունների ընդունարաններում, ուսումնական հաստատություններում, ներառյալ դպրոցները, հանդիպումների և խորհրդակցությունների ժամանակ, որտեղ անհնար է պահպանել 2 մետր հեռավորությունը:
Կառավարության որոշման մեջ նշված են նաև բացառությունները: Օրինակ, դիմակ կրելը պարտադիր չէ մինչև վեց տարեկան երեխաների, սահմանափակ հնարավորություններով և շնչառական հիվանդություններ ունեցող անձանց համար:
Հասարակական վայրերում դիմակի բացակայության դեպքում տուգանքը կկազմի 20 լարի (մոտ 7 դոլար), իսկ իրավաբանական անձանց համար՝ 500 լարի (166 դոլար):