«Առաջին լրատվական»-ի զրուցակիցն է ՀՀ արտակարգ և լիազոր դեսպան, Արցախի ԱԳ նախկին նախարար Արման Մելիքյանը:
–Եվրախորհրդարանի պատգամավոր Մարինա Կալյուրանդը, եվրախորհրդարանի Հայաստանի հարցով զեկուցող պատգամավոր Տրայան Բեսեսկոնւ, եվրախորհրդարանի Ադրբեջանի հարցով զեկուցող պատգամավոր Ժելենա Զովկոն հանդես են եկել համատեղ հայտարարությամբ Հայաստանի և Լեռնային Ղարաբաղի միջև նոր մայրուղու կառուցման վերաբերյալ։ Հայտարարությունն ամբողջությամբ ադրբեջանամետ է, նշվում է, թե նման ճանապարչհի կառուցման որոշումը կայացվել է առանց Ադրբեջանի իրավասու մարմինների որոշման,«այն կարող է խորացնել Լեռնային Ղարաբաղի և նրա հարակից շրջանների ապօրինի գրավումը»,-նշված է հայտարարության մեջ։ Ի՞նչ դիտարկումներ ունեք նման հայտարարության վերաբերյալ, ինչու՞ այն հնարավոր դարձավ և որոնք են դրա հետևանքներ
-Որքան շատ լինեն Արցախը Հայաստանի Հանրապետությանը կապող բարեկարգ ճանապարհներն, այնքան կնվազի պատերազմի վերսկսման հավանականությունը և սա պետք է լինի մեր գլխավոր առաջնահերթությունը: Արցախի տարածքում ճանապարհաշինությանը և, ընդհանրապես, ռազմավարական նշանակություն ունեցող հարցերի հետ կապված որոշումների կայացումը արցախահայության ինքնիշխան իրավունքն է, որը չի կարող զիջվել որևէ օտար պետության կամ կառույցի: Գտնում եմ, որ օգտակար կլինի, եթե այս նախագծին հետևի, օրինակ, Մեղրի-Բերձոր-Քարվաճառ- Վարդենիս բարձրակարգ ճանապարհի կառուցումը, որը լրացուցիչ ելք կապահովի Արցախի հարավային շրջաններից դեպի Բագրատաշեն: Անշուշտ, հայկական դիվանագիտությունը նաև լրացուցիչ ջանքեր պետք է գործադրի միջազգային հանրության համար այս կարգի որոշումներն որոշումներն առավել ընկալելի և ընդունելի դարձնելու համար:
Հայտարարությանն արձագանքել է նաև Ստեփանակերտը՝ նշելով, որ Արցախի Հանրապետության որևէ նախագիծ հարևան Ադրբեջանի հետ համաձայնեցնելու կոչերը զուրկ են ցանկացած իրավական հիմքից և տրամաբանությունից:Ինչպե՞ս եք գնահատում այս արձագանքը
-Արցախի ԱԳՆ արձագանքը համարժեք է և կարծում եմ, որ դրանում ներկայացված փաստարկները լիովին արտացոլում են առկա իրողությունները:
–Կարո՞ղ է նման հայտարարությունները հող հանդիսանան, որպեսի Եվրամիություն–Ադրբեջան համաձայնագրում տարածքային ամբողջականության վերաբերյալ ձևակերպում տեղ գտնի։
-Այս ուղղությամբ հավանաբար ջանքեր կգործադրվեն և չի կարելի բացառել, որ դրանք մասնակիորեն կարող են հաջողությամբ պսակվել: Այս համատեքստում կարևոր կլինի, որ ՀՀ քաղաքական ղեկավարությունը, հակամարտության կարգավորման բանակցություններում ներգրավված պաշտոնատարները լրացուցիչ տարրերով ու փաստարկներով հարստացնեն սեփաական մոտեցումները: Հայաստանի ագրեսոր լինելու վերաբերյալ ադրբեջանական թեզը, որը հարմարեցված է Մադրիդյան սկզբունքներով առաջարկվող հակամարտության կարգավորման բանաձևին պետք է վերջնականապես չեզոքացվի:
