Երեկ` նոյեմբերի 23-ին, ՀՀ վարչական դատարանը մերժեց ՀՔԱ Վանաձորի գրասենյակի հայցն ընդդեմ ՀՀ պաշտպանության նախարարության՝ «ՀՀ ՊՆ նախարարի` գաղտնագրման ենթակա տեղեկությունների ընդլայնված գերատեսչական ցանկի մասին» հրամանն անվավեր ճանաչելու եւ ՊՆ-ին տեղեկատվություն տրամադրել պարտավորեցնելու պահանջի մասին:
Հիշեցնենք, որ 2010 թ. փետրվարի 10-ին ՀՔԱ Վանաձորի գրասենյակը դիմել էր ՀՀ ՊՆ-ը` «Տեղեկատվության ազատության մասին» ՀՀ օրենքի համաձայն, 2009 թ. ՀՀ զինված ուժերում մահացած ժամկետային եւ պայմանագրային զինծառայողների թիվը, նրանց անուն ազգանունները եւ հասցեները տրամադրելու խնդրանքով: Պաշտպանության նախարարությունը մերժել էր տեղեկատվության տրամադրումը՝ պատճառաբանելով, որ պահանջվող տեղեկատվությունը «ՀՀ ՊՆ-ի` գաղտնագրման ենթակա ընդլայնված գերատեսչական ցանկի մասին» հրամանի համաձայն` համարվում է գաղտնիք:
Փաստորեն, Վարչական դատարանն այդպես էլ ընդունեց` հիմնավորելով, որ «զինծառայողների` ծառայություն իրականացնելու հետ կապված մահացության դեպքերը չեն կարող դիտվել սովորական առօրեական դեպք, ուստի դատարանը հիմնավոր է համարում պատասխանող կողմի դիրքորոշումը առ այն, որ այդ դեպքերը պետք է դասվեն զորքերում տեղի ունեցած արտակարգ դեպքերի շարքին» եւ նման տեղեկատվությունը, «Պետական և ծառայողական գաղտնիքի մասին» ՀՀ օրենքի համաձայն, պետք է համարվի գաղտնի, հրապարակման ոչ ենթակա տեղեկատվություն: Իրավապաշտպան Արթուր Սաքունցը այս որոշումը համարում է հակասահմանադրական, որով վարչական դատարանը նպաստում է կյանքի իրավունքի խախտման դեպքերով հասարակական կառույցների վերահսկողությունը խոչընդոտելուն, քրեական գործերը կոծկելուն, եւ բանակում ստեղծված անվերահսկելի վիճակը խորացնելուն:
Վարչական դատարանի այս որոշումը իրավապաշտպան կազմակերպությունը բողոքարկելու է վճռաբեկ դատարանում:
