Թուրքիայի նախկին փոխվարչապետ և արտգործնախարար, ներկայում «Ժողովրդավարություն և առաջընթաց» (DEVA) կուսակցության առաջնորդ Ալի Բաբաջանը հայտարարել է, որ Թուրքիայում հրապարակվող տնտեսական տվյալները արժանահավատ լինել չեն կարող, քանի որ քաղաքական ճնշում է գործադրվում անկախ կազմակերպությունների վրա։
Բաբաջանի խոսքով՝ Թուրքիան գնալով պարփակվում է իր մեջ և փոքրանում. այն այլևս բաց չէ բոլորի առջև և չունի ինքնավստահություն։ Նա Թուրքիային նմանեցրել է 200 բնակարանից բաղկացած բնակելի շենքում ապրող մեկին, որը մյուս բոլոր 199 բնակարաններում ապրողներին համարում է իրեն թշնամի։
Այդ իսկ պատճառով, ըստ նախկին փոխվարչապետի, Թուրքիան առաջնորդվում է վախեցնելու, արգելելու սկզբունքով և փորձում է վախեցնել թե՛ իր քաղաքացիներին, թե՛ օտարներին։
Բաբաջանը կարծում է, որ ներկայիս իշխանությունների վիճակը շատ բարդ է։
«Եթե որևէ հույս ունենայինք ներկայիս իշխանություններից, նոր կուսակցություն չէինք ստեղծի»,-ընդգծել է Թուրքիայի նախկին փոխվարչապետ Բաբաջանը։