Հայկական շախմատի առաջատար Լևոն Արոնյանը փայլուն ելույթով աչքի է ընկնում Clutch Chess International խոշոր մրցաշարում: Քառորդ եզրափակչում մեր շախմատիստը մրցեց Ռուսաստանը ներկայացնող Ալեքսանդր Գրիշչուկի հետ և, դրամատիկ պայքարում առավելության հասնելով, դուրս եկավ կիսաեզրափակիչ:
Առաջին մրցումային օրը գրոսմայստերները խաղացին 6 պարտիա, որոնցից երեքն ավարտվեց ոչ-ոքի արդյունքով, մեկում Արոնյանը պարտվեց, իսկ երկուսում առավելության հասավ: Այս փուլից հետո Արոնյանը 8 հնարավորից ուներ 5 միավոր: Երկրորդ մրցումային օրը կողմերը պայքարը սկսեցին ոչ-ոքիով, հետո Արոնյանը պարտություն կրեց, սակայն օրվա երրորդ պարտիայում հաղթանակ տարավ։ Հաջորդ երեք պարտիաները ընթացան նույն սցենարով՝ ոչ-ոքի, Արոնյանը պարտություն կրեց ու հաղթեց։ Վերջին պարտիայում վաստակած երեք միավորի շնորհիվ Արոնյանը առավելության հասավ ընդհանուր 10։8 հաշվով։ 11-րդ և 12-րդ պարտիաներում հաղթանակի համար շնորհվում է 3-ական միավոր, ոչ-ոքիի համար՝ 1.5-ական միավոր։
Եզրափակչի ուղեգրի համար Արոնյանը կմրցի աշխարհի գործող չեմպիոն Մագնուս Կարլսենի հետ: Կիսաեզրափակչի մյուս զույգը կկազմեն Ուսելի Սոն և Ֆաբիանո Կարուանան: Մրցաշարին, որը բաղկացած է 12 տուրից, մասնակցում են նաև համաշխարհային շախմատի առաջատարներ Մաքսիմ Վաշիե-Լագրավը, Լեյներ Դոմինգեսը, ՖաբիանուԿարուանան, Ուեսլի Սոն: Արագ շախմատի այս մրցաշարը կեզրափակվի հունիսի 14-ին:
Ի դեպ, մրցաշարի մրցանակային ֆոնդը կազմում է 265 հազար ԱՄՆ դոլար: Անդրադառնալով Գրիշչուկի նկատմամբ տարած հաղթանակին՝ Լևոն Արոնյանը մասնավորապես ասել է. «Ես ու Սաշան NBA-ի մեծ երկրպագուներ ենք: Սա կարծես փլեյ-օֆում «Բոսթոն Սելթիկսի» 7-րդ խաղն էր: Ապրում ենք այս տեսակ պահերի համար: Կարծում եմ՝ թե՛ ես, թե՛ մրցակիցս հաճույք ստացանք խաղից: Մեր կարիերայի ընթացքում շատ ենք կոտրել մեկմեկու սրտերը՝ հաղթելով որոշիչ պարտիաներում»:
Հայ գրոսմայստերը քառորդ եզրափակչի պարտիան համեմատել է սիրահարվածության հետ. «Արյունը արագորեն վազում է մարմնովդ, և ոչնչի մասին մտածել այլևս չես կարողանում: Կարծում եմ՝ հենց սրա համար էլ մենք շախմատ ենք խաղում»։
Արոնյանի հերթական վերելքը մեծ շախմատում կարելի է թերևս որակել մեկ բառով՝ ֆանտաստիկ։ Այս տարվա մարտի 31-ին Արոնյանի կյանքում տեղի ունեցավ ողբերգություն. ավտովթարի հետևանքով կյանքից հեռացավ նրա կինը՝ Արիանա Կաոիլին։ Շատերը շտապեցին ենթադրել, որ մեծ ողբերգությունը իր հետևանքը կթողնի Լևոն Արոնյանի կարիերայի վրա։ Այո, թվում էր, թե տևական ժամանակ մեր շախմատի առաջատարին չենք տեսնի մեծ մրցաշարերում։ Արոնյանն արեց անհնարինը։ Նա չկտրվեց շախմատից և այսօր տանում է տպավորիչ հաղթանակներ։ Սա խոսում է Արոնյանի ուժեղ մարզիկի և վերջապես ուժեղ մարդու տեսակի մասին։
Շատ են դեպքերը, երբ հայտնի մարդիկ տեղի ունեցած ողբերգություններից հետո ուղղակի հանձնվում են։ Արոնյանի դեպքում տեղի է ունենում հակառակը։ Արոնյանը բավական հաջող հանդես եկավ նաև այս տարվա ապրիլին տեղի ունեցած Ազգերի լիգայի խաղարկությունում։ Ազգերի լիգայի խաղարկության շրջանակներում էլ նա ելույթ ունեցավ Եվրոպայի հավաքականի կազմում՝ անցկացնելով բազմաթիվ հիանալի պարտիաներ։
Շախմատային աշխարհում արդեն իսկ խոսում են հայ շախմատիստի կարիերայում միանգամայն նոր փուլի մեկնարկի մասին։ Դեռևս անցյալ տարվա վերջին Արոնյանը որոշակի դադարից հետո լուրջ հաջողություններ էր գնացել։ Մասնավորապես, նա հաղթել էր Սենթ Լյուիսում տեղի ունեցած Grand Chess խոշոր մրցաշարում։ Ընդ որում, մեր գրոսմայստերը 36 հնարավորից վաստակել էր 22 միավոր, ինչը բավական բարձր ցուցանիշ է։ Սենթ Լյուիսի մրցաշարից առաջ ՖԻԴԵ-ն հրապարակել էր անհատական դասակարգման աղյուսակը, որում Լևոն Արոնյանը զգալի առաջընթաց էր գրանցել՝ վերադառնալով լավագույն տասնյակ։
Արոնյանը այս պահին 7-րդն է աշխարհում: Լավագույն 10-յակում են նաև Մագնուս Կարլսենը, Ֆաբիանու Կարուանան, Դին Լիժենը, Յան Նեպոմնյաշչին, Մաքսիմ Վաշիե-Լագրավը, Ալեքսանդր Գրիշչուկը, Ուեսլի Սոն, Թեյմուր Ռաջաբովը և Անիշ Գիրին: Մեկ տարի առաջ վարկանիշային աղյուսակում Արոնյանը միայն 14-րդն էր։ Սենթ Լյուիսի մրցաշարից առաջ թե՛ Լևոն Արոնյանը և թե՛ մեր ազգային հավաքականը միջազգային ասպարեզում լուրջ հաջողությունների չէին հասնում: Մասնավորապես, աշխարհի չեմպիոնի հավակնորդների մրցաշարում Արոնյանի խիստ անհաջող ելույթից հետո հայկական շախմատում իրական անկում էր սկսվել: Ոմանք նույնիսկ հիասթափվել էին՝ պնդելով, որ անկման փուլ է սկսվել նաև Արոնյանի մոտ: Վերջինս դուրս էր մնացել ՖԻԴԵ-ի վարկանիշային աղյուսակի լավագույն տասնյակից:
Clutch Chess International մրցաշարում Արոնյանի ելույթը իսկապես ֆանտաստիկ է: Վերջին օրերին Արոնյանը հայտնվել է շախմատային աշխարհի ուշադրության կենտրոնում: Բոլորը սպասում են Արոնյան-Կարլսեն մրցամարտին՝ այն համարելով վաղաժամ եզրափակիչ։