Ֆուտբոլի Հայաստանի ազգային հավաքականի ավագ Հենրիխ Մխիթարյանը չի ցանկանում հեռանալ «Ռոմայից» և ամեն ինչ անում է կարիերան հենց այս ակումբում շարունակելու համար։ «Դեռևս չգիտեմ, թե որքան ժամանակ կխաղամ, բայց ինձ դուր է գալիս Հռոմը և «Ռոմա» ակումբը: Ես կցանկանայի մնալ այստեղ և դրա համար անում եմ ամեն ինչ՝ սովորում եմ իտալերեն, ջանասիրաբար մարզվում եմ: Թիմը և ակումբի փիլիսոփայությունը համապատասխան են ինձ»,- Football Italia-ի թղթակցի հետ զրույցում ասել է մեր ֆուտբոլիտը: Վերջինս հույս է հայտնել, որ հաջորդ մրցաշրջանում ևս կխաղա Հռոմում և, ինչու ոչ, ևս մի քանի տարի կանցկացնի «Ռոմայում»:
Մխիթարյանի վարձակալության պայմանագիրը «Ռոմայի» հետ նախատեսված էր մինչև հունիսի 30-ը: Մխիթարյանը թիմում կմնա մինչև մրցաշրջանի վերջը՝ անկախ նրանից, թե երբ այն կավարտվի: Մխիթարյանն այս մրցաշրջանի սկզբում «Արսենալից» վարձավճարով տեղափոխվել էր «Ռոմա»: Ֆուտբոլիստն այս ընթացքում դարձել է 6 գոլի և 3 գոլային փոխանցման հեղինակ: Փաստորեն, մինչ «Արսենալն» ու «Ռոման» ակտիվ բանակցում են Մխիթարյանի տրանսֆերի շուրջ, հայ ֆուտբոլիստը շարունակում է հստակ ներկայացնել իր մտադրությունն ու ըստ էության որոշումը ապագայի վերաբերյալ։ Մխիթարյանը որոշել է շարունակել ելույթները, և դա փաստ է։
Ինչ խոսք, միշտ չէ, որ ֆուտբոլիստի որոշումը բավարար է գործարքի կամ պայմանագիր կնքելու համար, բայց… Տվյալ իրավիճակում մենք գործ ունենք այնպիսի պատկերի հետ, երբ Մխիթարյանի՝ այլ թիմ տեղափոխվելը, առավել ևս «Արսենալ» վերադառնալն ուղղակի անհնար է թվում։ Մխիթարյանի նկատմամբ կարծես հետաքրքրություն չեն ցուցաբերում նաև այլ թիմերը։ Այո, ամիսներ առաջ տեղեկություն տարածվեց, որ հայ ֆուտբոլիստին իր կազմում է ցանկանում տեսնել Սանկտ Պետերբուրգի «Զենիթը», բայց ռուսական ակումբը Մխիթարյանի տրանսֆերը ձեռք բերելու ուղղությամբ քայլեր չձեռնարկեց։ Կարիերան «Ռոմայում» շարունակելու մասին հայտարարություններով Մխիթարյանն ակամայից վանում է թիմերին, որոնք մտադրություն ունեին իր հետ կապված։
Այս տարվա ապրիլին, երբ «Արսենալի» և «Ռոմայի» միջև բանակցությունները ակտիվ ընթացք էին ստացել, Մխիթարյանը մասնավորապես ասել էր. «Իտալիայում ես հաճույք եմ ստանում ֆուտբոլից, քանի որ այստեղ առավել շատ են կենտրոնացած մարտավարության վրա: «Ռոմայում» ինձ ավելի շատ են վստահում, քան «Արսենալում» կամ «Մանչեսթեր Յունայթեդում»: Վերջինիս կազմում երեք տիտղոս եմ նվաճել, «Արսենալում» անհաջող ստացվեց ամեն ինչ, քանի որ ես և մարզիչ Էմերին այլ պատկերացումներ ունենք ֆուտբոլի մասին»։
Ըստ իտալական մամուլի՝ վերջին շրջանում Մխիթարյանի տրանսֆերի շուրջ ակտիվ բանակցությունները շարունակվում են։ «Ռոման» արդեն երկու անգամ մերժում է ստացել՝ Մխիթարյանի տրանսֆերի համար առաջարկելով նախ՝ 10, այնուհետև՝ 15 միլիոն եվրո: Լոնդոնյան ակումբը հայ ֆուտբոլիստի համար ակնկալում էր 20-25 միլիոն եվրո ստանալ: Հիմա քննարկվում են տրանսֆերի իրականացման հնարավոր այլ տարբերակներ։ «Ռոմայի» ղեկավարությունը ցանկանում է որպես այլընտրանքային տարբերակ ևս մեկ տարով երկարաձգել վարձակալության պայմանագիրը։ Նշվում է, որ Մխիթարյանը «Ռոմայի» խաղացող դառնալու համար պատրաստ է աշխատավարձի խոշոր կրճատման։ Նշվում է նաև, որ հայ ֆուտբոլիստի իտալացի գործակալ Մինո Ռայոլան «Արսենալին» արդեն իսկ առաջարկել է ևս մեկ մրցաշրջանով երկարացնել վարձակալությունը։ Ըստ ԶԼՄ-ների՝ հայ ֆուտբոլիստը պատրաստ է աշխատավարձի կիսով չափ նվազեցմանը ևս մեկ տարի էլ «Ռոմայում» խաղալու պայմանին։
Լոնդոնի «Արսենալի» երկրպագուները իրենց հերթին ակումբի ղեկավարությունից պահանջում են ամեն գնով ձեռք բերել իտալական «Ռոմայի» և Հոլանդիայի ազգային հավաքականի 21-ամյա կիսապաշտպան Ջասթին Կլյուվերտին։ Ըստ ԶԼՄ-ների՝ Կլյուվերտի տրանսֆերի համար «Արսենալը» պատրաստ է «Ռոմային» տրամադրել Հայաստանի ազգային հավաքականի ավագ Հենրիխ Մխիթարյանին 15 միլիոն եվրո հավելավճարով։ «Արսենալի» երկրպագուները հնարավոր գործարքը համարում են նաև որպես իդեալական բիզնես նախագիծ, որը ճգնաժամային պայմաններում լուրջ խթան կհանդիսանա։
Վերլուծելով վերջին զարգացումները՝ կարող ենք արձանագրել, որ գալիք մրցաշրջանում «Ռոմայում» Մխիթարյանի խաղալն ուղղակի այլընտրանք չունի։ Մնում է միայն հասկանալ, թե ինչ պայմաններով կերկարաձգվի պայմանագիրը։ Իտալիայում Մխիթարյանի առնչությամբ հավանական են համարում վարձակալության ժամկետի երկարացման տարբերակը։ Մասնավորապես նշվում է, որ «Ռոման» ֆինանսական խնդիրների պատճառով ևս մեկ տարով կերկարաձգի վարձակալության ժամկետը՝ պայմանով, որ հաջորդ տարի կգնի Մխիթարյանի ամբողջական տրանսֆերը:
Իտալական Ա սերիայի կազմակերպիչները նախօրեին հաստատել էին մրցաշրջանի վերսկսման օրը: Կորոնավիրուսի համավարակի պատճառով դեռևս մարտին ընդհատված առաջնությունը կվերսկսվի հունիսի 13-ին: Իտալիայի կառավարությունը ֆուտբոլային ակումբներին դեռ երկու շաբաթ առաջ թույլատրել էր վերսկսել մարզումները:
