Ողջունելի է, որ մեր վրացի գործընկերները պատրաստակամություն են հայտնել, նաև քաղաքացիական սեկտորի ներկայացուցիչները ստորագրահավաք են նախաձեռնել Հայաստանին օգնելու համար: Այս մասին «Առաջին լրատվական»-ի հետ զրույցում նշեց «Իմ քայլը» խմբակցության պատգամավոր Արման Եղոյանը:
«Կարծում եմ՝ առանց ստորագրահավաքի էլ այդ պատրաստակամությունը կար: Մենք եղբայրական և շատ նման ժողովուրդներ ենք, նաև բարեկամ երկրներ: Ինչ վերաբերում է Վրաստանի փորձին, մենք գտնվում ենք համավարակի տարածման մեջտեղում: Այսինքն համավարակն այնպես չի, որ ավարտվել է: Մենք միայն համավարակի համաշխարհային մասշտաբով հաղթահարումից հետո կկարողանանք ասել՝ ով ավելի արդյունավետ գործեց: Բացի այդ, այս վարակի առանձնահոտկությունները դեռ բացահայտված չեն: Փորձի փոխանակում, այո, պետք է անել, բայց եթե մենք գոնե այսօրվանից սկսած հետևանք պարետատան որոշումներին՝ առանց քաղաքական այդ շահարկումների, թե ինչի՞ էին փետրվարին ասում՝ վերարկու հագեք, իսկ հունիսին ասում են վերնաշապիկ հագեք, առանց հաշվի առնելով, որ փետրվարին ցուրտ է, իսկ հունիսի՝ շոգ, որ փետրվարին նույնիսկ մեկ վարակակիր չկար, իսկ հիմա 10 հազարն անցել է: Շատ սխալ է իրավիճակը շահարկելը: Ճիշտ պատերազմի ժամանակի նման է, այսօր կարող է մի որոշում լինել, իսկ մի քանի ժամ անց որոշումը փոխվել»,-ասաց նա: