Իզմիրի մզկիթների բարձրախոսներով ազանի փոխարեն հնչեցված «Bella ciao» երգի տեսանյութով կիսված թուրք ընդդիմադիր գործիչը կարող է ազատազրկվել 1-3 տարով։
Ավելի վաղ Իզմիրի գլխավոր դատախազությունը տեղեկացրել էր, որ հետաքննություն է սկսվել մզկիթներում այդ երգը հնչեցրած և այդ տեսագրությունը սոցցանցերում տարածած անձանց դեմ։
Դատախազության թիրախում է հայտնվել նաև ընդդիմադիր «Ժողովրդահանրապետական» կուսակցության (ԺՀԿ-CHP) ներկայացուցիչ Բանու Օզդեմիրը։ Վերջինս մայիսի 20-ին և 21-ին կիսվել էր մզկիթներում հնչած հայտնի երգի տեսաձայնագրությամբ և մեկնաբանություներ արել ինչի առթիվ մեղադրվել է «այդ արարքը դատապարտելու փոխարեն հանրության շրջանում հրապարակայնորեն թշնամանք ու ատելություն հրահրելու» մեջ։
Ընդդիմադիր գործիչը մայիսի 22-ին կալանավորվել էր, սակայն մայիսի 29-ին ազատ է արձակվել՝ մինչև դատական վճռի կայացումը։ Օզդեմիրի դեմ դատավարությունը կսկսվի 2020թ․ սեպտեմբերի 17-ին։