Միայն այսօրվա դրությամբ ունենք 796 ստուգում, որի արդյունքում կասեցվել է 220 տնտեսվարող սուբյեկտների գործունեություն։ Այս մասին այսօր ճեպազրույցի ժամանակ ասաց վարչապետի աշխատակազմի տեսչական մարմինների աշխատանքների համակարգման գրասենյակի ղեկավար Արթուր Ասոյան։
Նա նշեց, որ այս գործողություններում ներգրավված են գրեթե բոլոր տեսչական մարմինները և աշխատում են օր ու գիշեր, որ հնարավոր լինի ապահովել հանրային անվտանգությունը. «Սակայն այդ ջանքերն ապարդյուն կլինեն, եթե համապատասխան արձագանք չզգանք բիզնեսից ու քաղաքացիներից։ Դրան կարող ենք հասնել հանրային վարքագծի, բիզնեսի վարքագծի փոփոխության։ Մենք պետք է սովորենք ապրել այս իրավիճակում բնականոն կյանքով՝ պահպանելով մի քանի հեշտ կանոններ»,-ասաց Արթուր Ասոյանը։
Համակցված գործողություններ են իրականացվում ոստիկանության ուժերի հետ, ինչը ևս տալիս է ցանկալի արդյունքներ։ Շուրջ 10 օր նման միջոցառումներ են իրականացվել Դավթաշեն, Նորք Մարաշ, Փոքր Կենտրոն, Մեծ Կենտրոն, Արաբկիր շրջաններում. «Նախօրոք չենք իրազեկելու այդ միջոցառումների մասին, որպեսզի ոչ բարեխիղճ տնտեսվարողներն անակնկալի գան և պատասխանատվություն կրեն իրենց վարքագծի համար»,-ասաց Արթուր Ասոյանը։
