Ծիրանի բերքի առումով այս տարի վիճակը վատ է։ Գյուղացին կհավաքի միջին բերքատվության մոտ 40 տոկոսը։ Այդ մասին «Առաջին լրատվական»-ի հետ զրույցում ասաց «Ագրարագյուղացիական միավորում» ՀԿ նախագահ Հրաչ Բերբերյանը։
«Լավ տարի չէ։ Միջին տարի է։ Հիմնական պատճառը սնկային հիվանդություններն են և փոշոտումը։ Այս տարի փոշոտումը վատ է եղել, մեղու քիչ է եղել։ Դրան զուգահեռ նաև անձրևները, որոնք չթողեցին՝ մեղուն աշխատի, մյուս կողմից՝ հենց անձրևներն էլ խթանեցին սնկային հիվանդությունները»,- պատճառների մասին նշեց Հրաչ Բերբերյանը։
Ծիրանի արտահանման հիմնական շուկան Ռուսաստանն ու Վրաստանն են։ Նախկինում ծիրանի ամենաբարձր գինը տալիս էին վրացիները։ Այժմ մտավախություն կա, որ կորոնավիրուսային համավարակով պայմանավորված՝ վրացիները չեն գնի հայկական ծիրան։ Այս մտահոգությունների մասով Հրաչ Բերբերյանը նշեց՝ մեզանում կան թշնամիներ, ովքեր երազում են, որ մեր ծիրանը Ռուսաստան կամ Վրաստան չգնա։ «Ուրեմն թող իրենց կարծիքները պահեն իրենց ու պատահական հայտարարություններ չանեն»,- ասաց մեր զրուցակիցը։
Հստակեցրինք՝ որպես ոլորտի մասնագետ, մտավախություն չունի՞ այս մասով, Բերբերյանն ասաց՝ եթե վատ աշխատենք, փաստաթղթերը սխալ ձևակերպենք, Ռուսաստանի հետ հարաբերությունները փչացնենք, իհարկե, խոչընդոտներ կլինեն։ «Նորմալ հարաբերությունների դեպքում ի՞նչ խոչընդոտ։ Ես մտածում եմ՝ մենք այդքան ծիրան չենք ունենա, որ արտահանենք, ոչ թե Ռուսաստանում կամ Վրաստանում խնդիր կունենանք»,- շեշտեց ոլորտի մասնագետը։
Ծիրանի բերքի նվազումը գուցե հանգեցնի նաև ներքին շուկայում գնաճի, չբացառեց Հրաչ Բերբերյանը․ «Կարծում եմ՝ այո, կլինի, որովհետև բերքը քիչ է»։ Բերբերյանի խոսքերով՝ մենք որակային առումով ևս խնդիրներ կունենանք։ Չենք ունենա նախորդ տարիների նման լավ բերք։ «Ընդհանրապես, արտահանվում է ընդհանուր բերքի 10-15 տոկոսը։
Դրանից ավելի մենք ի վիճակի չենք արտահանել։ Էդ որ առաջվա կառավարությունները հայտարարում էին 50 հազար տոննա, 100 հազար տոննա, բլեֆ է։ Դա կարող էր լինել վերամշակման դեպքում։ Այս տարի վերամշակում շատ կունենան, լավ առաջարկ ունեն։ Դա էլ կախված է նրանից, թե գյուղացին ինչ գին կառաջարկի։ Բայց որ առաջարկը կլինի՝ դա հաստատ է»,- նշեց Հրաչ Բերբերյանը