ՊԵԿ-ը հայտնել է, թե ինչու է հրաժարական ներկայացրել կոմիտեի նախագահ Դավիթ Անանյանը: Ըստ տեղեկության՝ պատճառը եղել է համակարգի կադրերից մեկին հեռացնելու վարչապետի պահանջը, ինչին ի պատասխան Դավիթ Անանյանը ինքն է գրել հեռանալու դիմում, ըստ ՊԵԿ տեղեկության՝ հրաժարվելով հեռացնել ոլորտի երկարամյա փորձ ունեցող արդյունավետ կադրերից մեկին: ՊԵԿ պարզաբանումից դուրս, մամուլում կա խոսակցություն, որ խոսքը Արարատյան մաքսատան պետ Մհեր Մարտիրոսյանի մասին է, իսկ պատճառը՝ մաքսատանը հակահամաճարակային կանոնների խախտման արձանագրումը, որ արել է Նիկոլ Փաշինյանը քաղաքացիների հայտնած տեղեկատվության հիման վրա:
Նա հորդորել է Դավիթ Անանյանին շտկել վիճակը, սակայն հաջորդ անգամ եղել է նույնը, ինչի առիթով էլ վարչապետն ասել է, որ դա չի մնա անհետևանք: Փաստորեն, Դավիթ Անանյանը ընդդիմացել է պաշտոնյային հեռացնելու վարչապետի հորդորին: Մի կողմից էական է, իհարկե, թե հատկապես ինչ պաշտոնյայի մասին է խոսքը, որպեսզի պարզ լինի, թե հատկապես ի՞նչն է Դավիթ Անանյանի, այսպես ասած, ինքնազոհաբերման պատճառը: Մյուս կողմից էլ, իհարկե, կոնկրետ պաշտոնյան էական չէ, այլ էական է, որ Անանյանը բարձրաձայնում է պատճառը և ասում, որ հեռացել է՝ վարչապետի պահանջը համարելով անընդունելի: Նախ, իհարկե, կարևոր է անձը, կոնկրետ պաշտոնյան՝ հասկանալու համար, թե արդյոք անընդունելիությունն իսկապե՞ս կապված է եղել մասնագիտական կարողության հետ, թե՞ եղել է այլ պատճառ, որն Անանյանին թույլ չի տվել հեռացնել կոնկրետ պաշտոնյայի: Այդ պատճառը եղել է զուտ գործընկերային, մասնագիտական և մարդկային պատվի, արժանապատվությա՞ն տիրույթում, թե՞, այսպես ասած, այլ հարաբերությունների, որոնք կարող են կաշկանդել Դավիթ Անանյանին հեռացնել տվյալ պաշտոնյային, քանի որ նա էլ իր հերթին կարող էր հետո թիրախավորել Դավիթ Անանյանին:
Սա կարևոր է ոչ թե միջանձնային հարաբերության, այլ համակարգում եղած իրողությունների գնահատման, ըստ այդմ՝ կարևորագույն պաշտոն զբաղեցնող անձի հեռացման կամ հրաժարականի պատճառները հասկանալու առումով:
Առավել ևս, որ հրապարակելով այդ տեղեկությունը, Դավիթ Անանյանը փաստորեն իր հրաժարականին տալիս է այսպես ասած՝ պատվախնդիր իմիջ, ինչն իր հերթին առաջացնում է արդեն հարցադրում այլ իմաստով:
Մասնավորապես, արդյոք այդօրինակ բարձրաձայնումը կարո՞ղ է նշանակել, որ Դավիթ Անանյանը մտադիր է այդ իմիջային մեկնարկը կիրառել քաղաքական որևէ մեկնարկի համար:
Լուսանկարը՝ Armeniasputnik-ի