Կորոնավիրուսից Հայաստանում մահացած 132 անձանց անձնական տվյալների հրապարակման գործով այժմ զբաղվում են իրավապահները։ ԱԱԾ-ում փորձում են պարզել, թե ինչպես էր հնարավոր մահացած անձանց տվյալների հանրայնացումը։ ԱՆ խոսնակն արդեն իսկ հավաստել է այդ տվյալների իրականությանը համապատասխանելը։
Եվ մինչ իրավապահները զբաղվում են դրանց արտահոսքը կազմակերպած անձանց հայտնաբերելով, ոլորտի մասնագետները, փորձագետները բարձրաձայնում են Հայաստանում անձնական տվյալների պաշտպանության լրջագույն մեխանիզմների ստեղծման անհրաժեշտության մասին։
Տեղեկատվության անվտանգության փորձագետ Սամվել Մարտիրոսյանը, օրինակ, երեկ ֆեյսբուքյան իր էջում նախ գրել էր, որ կորոնավիրուսից մահացած անձանց անձնական տվյալները հրապարակած էջի ադմինը գտնվում է ՌԴ-ում և դա այն նույն էջն է, որը ժամանակ առաջ տարածում էր Սաֆարյան Ստյոպայի հեռախոսից իբր վերցրած, Ֆոտոշոփ արած սքրինշոթներ նամակագրություններից: «Սա կամ հաքերային հարձակում է, կամ ներքին սաբոտաժ։ Կապ չունի, երկու տարբերակներն էլ խոսում են այն մասին, որ անձնական տվյալները անպաշտպան են։ Եվ հարց է առաջանում մեր բոլորիս տվյալների պաշտպանության՝ կախված հեռախոսների վերահսկողության համակարգի, որն արդեն երրորդ ամիսն է՝ աշխատում է Հայաստանում։ Որո՞նք են երաշխիքները, որ մարդկանց տեղաշարժի ողջ տվյալները վաղը չեն հայտնվի ցանցում, կամ ադրբեջանական հետախուզության ձեռքում»,- գրել էր Մարտիրոսյանը՝ պատգամավորներին կոչ անելով ստեղծել հանրային վերահսկողության հանձնաժողով, ներառել ընդդիմադիր պատգամավորների և անկախ մասնագետների ու տեր կանգնել մեր բոլորիս տվյալներին։
ԱԺ «Իմ քայլը» խմբակցության պատգամավոր Գայանե Աբրահամյանը կողմ է հանձնաժողով ստեղծելու գաղափարին։ Նա «Առաջին լրատվական»-ի հետ զրույցում ասաց, որ նման հանձնաժողով ստեղծելու գաղափարը Ազգային ժողովում քննարկվել է դեռևս «Էլեկտրոնային հաղորդակցության մասին» ՀՀ օրենքում լրացումների կատարելու ժամանակ, երբ ԱԺ-ն տվեց իր համաձայնությունը, որպեսզի օնլայն վերահսկողություն սահմանվի կորոնավիրուսով վարակված քաղաքացիների կոնտակտներին հետևելու նպատակով: «Դեռևս երբ ԱԺ-ում քննարկվում էր տեղորոշման նախագիծը, այդ ժամանակ ևս քննարկվում էր հարցը՝ ստեղծել հանձնաժողով, որը կվերահսկի, որպեսզի արտակարգ դրությունից հետո տվյալները ոչնչացվեն պարտադիր կերպով, որպեսզի որևէ կերպով դա չփոխանցվի երրորդ կողմին և այլն։ Տվյալ իրավիճակում տվյալների արտահոսքը որևէ կերպ կապ չունի տեղորոշման օրենքի հետ, քանի որ այս օրերին տեսնում եմ նման շահարկումներ»,- ասաց Աբրահամյանը՝ հավելելով. «Ես լիովին կողմ եմ հանձնաժողով ստեղծելուն և ինքնս էլ կփորձեմ գործընկերներիս հետ ձեռնարկել այն»։
Անդրադառնալով հարցին, թե կատարվածը կարելի է սաբոտաժ բնորոշել իշխանության դեմ, Աբրահամյանը պատասխանեց. «Ամեն ինչ կարող ենք։ Ես հիմա հասկանում եմ, որ մեր երկրում այս պատերազմական իրավիճակում բոլոր հնարավոր մեթոդներն են կիրառում։ Եվ մեր որոշ հայրենակիցներ, քաղաքական այլ հայացքներ ունեցող անձինք հնարավոր բոլոր մեթոդների դիմում են՝ որևէ կերպ չտարանջատելով իշխանությունը պետությունից»,- ասաց Աբրահամյանը։
ԱԺ ԲՀԿ խմբակցության պատգամավոր Նաիրա Զոհրաբյանը ևս կողմ է հանձնաժողով ստեղծելուն։ Նա, արձագանքելով Սամվել Մարտիրոսյանի կոչին, մեզ հետ զրույցում ասաց, որ ընդունում է մասնագետի առաջարկը, և եթե պատգամավորները կողմ լինեն, կստեղծվի հանձնաժողով և կուսումնասիրվի, թե մեր անձնական տվյալներն ինչպես են պաշտպանվում կամ ինչպես պետք է պաշտպանվեն։