Կարանտինի սահմանափակումները խախտելու համար Ուկրաինայի նախագահ Վլադիմիր Զելենսկին կարող է տուգանել մինչև 17 հազար գրիվեն: Այս մասին «112 Ուկրաինա» հեռուստաալիքի եթերում ասել է ՆԳՆ փոխնախարար Անտոն Գերաշչենկոն:
Դեպքը, որի համար նախագահը տուգանքի է ենթարկվում, տեղի է ունեցել նախօրեին Խմելնիցկի քաղաքում, որտեղ այցով ժամանել է Ուկրաինայի ղեկավարը: Քաղաքի կենտրոնում շրջելիս այլ պաշտոնյաների հետ միասին Զելենսկին մտել է սրճարան և սուրճ խմել: Դրանից հետո իր Twitter-ում հայտնվեց մի գրառում. «Խմելնիցկիում հրաշալի սուրճ՝ բուրավետ և համեղ: Առաջին սրճարանները դուրս են գալիս կարանտինից, դանդաղորեն վերականգնվում ենք համաճարակից հետո»,- գրել է նա։
Զելենսկին սուրճը խմել է սրճարանի ներսում: Միևնույն ժամանակ, Ուկրաինայում հանրային սննդի հաստատությունների աշխատանքը դեռևս պաշտոնապես արգելված է՝ բացառությամբ բաց տարածքներում սպասարկմանը։ Սրճարանների և ռեստորանների աշխատանքը ամբողջովին կվերականգնվի միայն հունիսի 5-ից:
Գերաշչենկոն ասել է, որ նախագահին տուգանք է սպառնում կարանտինային միջոցառումները խախտելու համար:
Սակայն նա նշել է, որ պետության ղեկավարի մեղքը դեռևս ապացուցված չէ: Նա հիշեցրել է, որ ՆԳՆ-ն առաջին ագամը չէ, որ տուգանում է Զելենսկուն. «Երբ Վլադիմիր Զելենսկին 2019-ի ապրիլին ցույց տվեց իր քվեաթերթիկը, նրան տուգանեցին քվեարկության գաղտնիքը բացելու համար: Հետևաբար, իրավասու մարմինները կքննարկեն այդ հարցը»: