«Առաջին լրատվական»-ի զրուցակիցն է Արցախի Հանրապետության նախագահի գլխավոր խորհրդական–հատուկ հանձնարարություններով դեսպան Ռուդիկ Հյուսնունցը։
– Պարոն Հյուսնունց, ի՞նչ աշխատանք է ենթադրում Ձեր նոր պաշտոնը։
– Այդ ինստիտուտը վաղուց կա կառավարման նախագահական համակարգում, բայց մեր պարագայում ենթադրելու է ավելի հայեցակարգային պլանավորման ռազմավարական ծրագրերի շրջանակներում աշխատանք։ Ես կարծում եմ, որ այն նշաձողը, այն ծրագրային դրույթները, որ Արցախի Հանրապետության նախագահը ներկայացրել է հանրությանը՝ նոր մարտահրավեր է։ Մենք տարբեր բնագավառներում կատարելու ենք աշխատանք նոր գործելաոճով, նոր գործիքակազմով, և շոշափելի արդյունքները առաջիկա մեկ տարվա մեջ կտեսնենք։
– Կմանրամասնեք՝ ի՞նչ աշխատանք եք իրականացնելու։
– Նշեցի, որ ռազմավարական պլանավորման ծրագրերի շուրջ ենք աշխատելու։ Բոլոր գերատեսչությունները պետք է ունենան հայեցակարգեր, պլանավորման ծրագրային դրույթներ, որով մենք պետք է առաջնորդվենք ու գնահատենք մեր կառավարման համակարգի ու տվյալ գերատեսչության էֆեկտիվությունը։
– Սա ենթադրո՞ւմ է նաև սինխրոնացված աշխատանք Հայաստանի Հանրապետության հետ։
– Սա միայն Արցախին է վերաբերում, բայց բնականաբար ենթադրվում է, որ մեր երկու կառավարությունները ունենալու են համատեղ ծրագրեր, ունեն միատեսակ ծրագրեր երկրի քաղաքական ու տնտեսական զարգացման հետ կապված։ Բնականաբար, մենք աշխատելու ենք նաև Հայաստանի Հանրապետության կառավարության տարբեր գերատեսչությունների ու դրանց ղեկավարների հետ։
– Դուք գիտեք, որ այժմ շատ ակտիվորեն քննարկվում է Արցախի իշխանությունների իրականացրած կադրային քաղաքականությունը, և կան նաև շատ դժգոհություններ դրա հետ կապված։ Ի՞նչ տեսակետ ունեք հնչեցվող դժգոհությունների հետ կապված։
– Նախագահի քաղաքական որոշումը հետևյալն էր. բոլոր կարող ուժերը, որոնք ունեն ռեսուրսներ, գիտելիքներ ու կարող են մաս կազմել իր թիմի ծրագրային աշխատանքներին՝ մնալու են։ Բնականաբար, նշանակվել են նաև նոր դեմքեր։ Մենք մաքսիմալ ամեն ինչ արել ենք, որ կառավարության կազմը երիտասարդացնենք և նաև փորձ ունեցող կադրերով համալրենք։
– Իսկ նրանք, ովքեր դուրս մնացին՝ դժգոհում են։
– Անկեղծ ասած, միշտ եղել են դժգոհողներ, եղել են նաև գոհ լինողներ։ Մենք դրանք չպետք է հակադրենք իրար։ Մենք անում ենք մեր աշխատանքը, որ հանրությունը կառավարության աշխատանքից գոհ լինի։ Մենք ամեն ինչ անելու ենք, որպեսզի մեր ժողովուրդը գոհունակությամբ ընդունի այս իշխանություններին։ Դրա համար պետք է աշխատանք, ջանք ու եռանդ։ Մենք այդ ամենը չենք խնայելու, որպեսզի մեր ժողովրդի գոհունակությունը ստանանք։
– Տարբեր ուժեր խոսում են փողոցային պայքարի հնարավորության մասին։ Ի՞նչ կարծիք ունեք այդ մասին։
– Ղարաբաղում փողոցայինները ու փողոցային պայքարի հաջողությունները 0,01 տոկոս են։
– Նշում են, որ այս իշխանությունները ժամանակավոր են։
– Ամեն մարդ իրավունք ունի իր գնահատականներով ներկայանալ։ Ինձ համար դա սուտ է։ Ժողովուրդն ընտրել է լեգիտիմ իշխանություն։ Գործող նախագահ Արայիկ Հարությունյանը ստացել է մեր ժողովրդի 80 տոկոս քվեն։ Առաջին անգամ բացարձակ լեգիտիմ իշխանություն է ձևավորվել ոչ թե Հայաստանից կամ ռազմաքաղաքական ինչ-որ ճնշման տակ։ Պարզապես ժողովուրդն այս անգամ կարողացել է իր քվեով լեգիտիմ իշխանություն ձևավորել։
– Նախկինում այդպես չէ՞ր։
–Ես չեմ ուզում անդրադառնալ նախկինին։ Ես փաստ եմ արձանագրում, որ մենք նախկինում ունեցել ենք թերություններ, սխալներ։ Ու մենք պետք է ամեն ինչ անենք, որ այսօր մինիմալացնենք մեր սխալները։
