Երեկ երեկոյան վարչապետ Նիկոլ Փաշինյանը ֆեյսբուքյան իր էջում օգտատերերի հետ կիսվում էր տեսանյութերով, որոնցում երևում էր, որ հասարակության մի մասը չի կատարում պարետատան հրահանգները, սոցիալական հեռավորություն չի պահպանում, չի կրում դիմակներ: Շատերը քննադատում են, որ կառավարությունն ամեն ինչ թողել է հասարակության իրավագիտակցության վրա, և չկա մշակված համապատասխան ռազմավարություն:
«Առաջին լրատվական»-ի հետ զրույցում անդրադառնալով այս դիտարկմանը, ԿԳՄՍ փոխնախարարի Նարինե Թուխիկյանը նշեց. «Համաձայն չեմ այդ քննադատությունների հետ, քանի որ տեսնելով, թե աշխարհն ինչպես է դիմակայում այս արհավիրքին, կարող եմ ասել, որ ամեն բան իսկապես յուրաքանչյուրից է կախված: Մեծ հավաքները, բակերում մարդկանց կուտակումները փաստում է մի բան՝ մեր հասարակությունը անգիտակցաբար ինքնաոչնչացման վարք է դրսևորում: Չլսել պարետատան կամ առողջապահական հրահանգները և այսպես անփույթ վերաբերվել սեփական կյանքին, սա սուիցիդալ վարքի դրսևորում է, որը հոգեբաններն ավելի լավ կմեկնաբանեն:
Ամբողջ աշխարհում որևէ ռազմավարություն չի կարող հարյուր տոկոսանոց արդյունք ունենալ: Երկու երկիր ընտրել է ամեն ինչ բաց թողնելու քաղաքականությունը, այնտեղ սահմանափակումներ չեղան, մյուս երկրները որոշակի սահմանափակումների անցան: Բայց յուրաքանչյուր քաղաքացի պետք է հասկանա, որ անկախ նրանից, թե ինչ ռազմավարություն կընտրվի, սա իր անձնական կյանքն է, իր սիրելիի կյանքն ու առողջության հարցն է. անշուշտ այստեղ բարձր գիտակցության հարց կա»:
Նարինե Թուխիկյանի դիտարկմամբ՝ վարքաբանական կանոնները օրենքներով փոխել մեկ-երկու տարում հնարավոր չէ, սա նաև հոգեբանական խնդիր է: «Խախտումներ են արվում՝ առանց հասկանալու, որ դրանք վտանգավոր են կյանքի համար, և խախտումներից խուսափում են, երբ որ կա վախ տուգանվելու և ոչ թե կյանքի համար վտանգ. սա լուրջ հարց է: Մշակութաբանական առումով սա կրթական հարց է»:
Մանրամասն՝ տեսանյութում:
