Հունիսի 2-ին բելառուսական կողմի նախաձեռնությամբ հեռախոսազրույց է տեղի ունեցել Հայաստանի վարչապետի և Բելառուսի նախագահի միջև: Փաշինյանն ու Լուկաշենկոն քննարկել են կորոնավիրուսի վիճակը: Լուկաշենկոն նաև առողջություն է մաղթել Փաշինյանին ու ընտանիքին, որոնք վարակվել են կորոնավիրուսով, և հույս հայտնել, որ վարակի հաղթահարման հետ շուտով կգա դեմ առ դեմ հանդիպման հնարավորությունը:
Արդյոք Լուկաշենկոն նկատի ուներ հունիսի 24-ին հանդիպելու հնարավորությո՞ւնը, թե՞ ոչ՝ հստակ չէ։ Բանն այն է, որ այդ օրը Պուտինը նշանակել է հետաձգված շքերթը, հրավիրել նաև ԱՊՀ անդամ երկրների ղեկավարներին։ Գուցե, ըստ Լուկաշենկոյի, սա կարող է հարմար առիթ հանդիսանալ գազի գնի հարցը ևս մեկ անգամ բարձրաձայնելու համար։ Սա, թերևս, վերջին շրջանում Հայաստանն ու Բելառուսը «միավորող» ամենահիմնական հարցերից է և երկու երկրների հաճախակի շփման պատճառներից մեկը։
Ռուսաստանցի քաղաքագետ Ստանիսլավ Տարասովը մինչդեռ գտնում է՝ որքան էլ Փաշինյանն ու Լուկաշենկոն հեռախոսազրույցներ ունենան, քննարկեն գազի գնի հարցը, բարձրացնեն այդ խնդիրը՝ Մոսկվայի դիրքորոշումը հստակ է՝ գազի գինը կփոխվի միայն ավելի խոր ինտեգրացիայի դեպքում։ «Վերազգային մարմինների, ընդհանուր լայն շուկայի բացակայության պայմաններում մեկ կամ երկու գործընկերոջ համար արտոնություններ սահմանելը տեղին չէ։ Եթե այդ երկրները կարծում են, որ պետք են առավելություններ, ապա պետք է ավելի խոր ինտեգրվեն ԵԱՏՄ-ին։ Կողմերի փաստարկները հստակ են և անհասկանալի է, թե այս պայմաններում ինչ են քննարկում Հայաստանն ու Բելառուսը, երբ երկուսն էլ գազ չունեն»,- «Առաջին լրատվական»-ի հետ զրույցում ասաց նա։
Միևնույն ժամանակ մեր զրուցակիցն ընդգծեց. «Եվրոպայում էլ նույն բանն է կատարվում, այնտեղ էլ կա խոր ինտեգրացիա։ Իսկ այստեղ ինչ-որ էգոիստ մոտեցումների ենք բախվում։ Բատկան, այսինքն՝ Լուկաշենկոն, կարծում է, որ Բելառուսը շատ կարևոր աշխարհաքաղաքական դեր ունի Ռուսաստանի համար՝ նրան ծածկելով արևմտյան ուղղության վրա։ Հայաստանն էլ ասում է, որ բացառիկ աշխարհաքաղաքական դիրք ունի, ու Ռուսաստանը շատ ավելի է հետաքրքրված Հայաստանով, քան Հայաստանը Ռուսաստանով։ Ու դրա համար Ռուսաստանը պետք է վճարի։ Գյումրիում ռուսական բազան հայտնվել է, որ թուրքական ագրեսիայից պաշտպանի։ Բայց մենք հիմա շատ լավ հարաբերություններ ունենք Թուրքիայի հետ, նույնն էլ Ադրբեջանի հետ, մենք այդ տարածաշրջանում հայկական խաղաքարտը չենք օգտագործում։ Եվրամիության ՆԱՏՕ-ի հետ հարաբերությունների հետ կապված էլ, Բելառուսի վրա շեշտադրումներ չենք կատարում։ Այսինքն՝ համագործակցության համար վճարելու արգումենտները շատ էժանագին են ու անցողիկ չեն»։
Տարասովը նշեց՝ մինչև ԵԱՏՄ անդամ երկրները չզգան նեղ ինտեգրացիայի անհրաժեշտությունը և ոչ թե միմյանց ռեսուրսներն օգտագործելու հնարավորությունը, ոչ մի լավ բան չի ստացվի. «Այսինքն՝ իրավիճակը կմնա այնպես, ինչպես որ կա այժմ»։
Ռուսաստանը որևէ դիտարկում չունի Փաշինյան-Լուկաշենկո տանդեմի վերաբերյալ, ասաց մեր զրուցակիցը և հավելեց. «Պարզապես հետևում ենք, ամեն մեկն իր ժանրի մեջ ելույթներ է ունենում, մենք էլ հետևում ենք։ Մոսկվան էլ առանց մեղքերի չէ, իսկ քաղաքական դերասանների թատրոնը շատ պոպուլյար է այսօր»։