Պենտագոնն ԱՄՆ մայրաքաղաքի մերձակայքում տեղակայել է մոտ 1,6 հազար զինվորականի՝ աֆրոամերիկացի Ջորջ Ֆլոյդի մահից հետո սկսված անկարգությունների հետ կապված:
Այս մասին հայտնում է «Ռոյթերս» գործակալությունը՝ վկայակոչելով Ամերիկայի պաշտպանության նախարարության պաշտոնական ներկայացուցիչ Ջոնաթան Հոֆմանը:
Նա հստակեցրել է, որ կանոնավոր զորքերը տեղակայված չեն հենց Վաշինգտոնում, այլ Վաշինգտոնի մոտակայքում գտնվող ռազմաբազաներում են:
Զինվորականները «զգոնության տակ են», դեռեւս չեն օգնում քաղաքացիական իշխանություններին իրենց գործողություններում, հավելել է Պենտագոնի խոսնակը:
Մինեապոլիսի ոստիկանությունը մայիսի 25-ին ձերբակալել էր աֆրոամերիկացի Ջորջ Ֆլոյդին: Ձերբակալման ընթացքում ոստիկանը ծնկի է եկել տղամարդու պարանոցին: Ֆլոյդը գոռացել է, որ ինքը խեղդվում է, բայց իրավապահները դրան ուշադրություն չեն դարձրել: Արդյունքում տղամարդը մահացել է վերակենդանացման բաժանմունքում: Սա զանգվածային բողոքի ցույցեր և անկարգություններ է հարուցել Միացյալ Նահանգներում:
