Միացյալ Նահանգների նախկին փոխնախագահ և նախագահական ընտրություններում դեմոկրատական կուսակցության թեկնածու Ջո Բայդենը նախատեսում է հաջորդ շաբաթ ներկա գտնվել աֆրոամերիկացի Ջորջ Ֆլոյդի հուղարկավորությանը Հյուսթոնում: Այս մասին հաղորդում է USA Today- ը՝ վկայակոչելով Fort Bend-ի թաղման բյուրոյի ներկայացուցիցչի հայտարարությունը։
Ֆլոյդի հետ հանրային հրաժեշտը տեղի կունենա հունիսի 8-ին։ Հունիսի 9-ին տեղի կունենա փակ արարողությունը։
Ավելի վաղ հայտնի էր դարձել, որ հրաժեշտի արարողության կազմակերպման բոլոր ծախսերն իր վրա է վերցրել ամերիկացի բռնցքամարտիկ Ֆլոյդ Մեյվեզեր-կրտսերը։ Սգո արարողություններ կանցկացվեն Հյուսթոնում, Մինեսոտայում և Շարլոտում։
Հիշեցնենք, որ ամերիկյան մի շարք քաղաքներում տեղի ունեցող բողոքի ցույցերը սկսվել են մայիսի 25-ին սոցցանցերում մի տեսանյութի տարածումից հետո, որտեղ ոստիկանը Ջորջ Ֆլոյդ անունով աֆրոամերիկացի տղամարդուն պառկեցրել է գետնին ու ծնկով սեղմում է նրա վզին։ Անտեսելով տղամարդու շնչել չկարողանալու մասին խոսքերը՝ ոստիկանը հրաժարվել է նրան բաց թողնել, ինչի հետևանքով Ֆլոյդը մահացել է:
