Ոստիկաններն արցունքաբեր գազ են կիրառել ոստիկանական բռնության և ռասիզմի դեմ դուրս եկած չարտոնված ցույցի մասնակիցների նկատմամբ, որը տեղի է ունեցել Փարիզում, հունիսի 2-ի երեկոյան։ Այս մասին հաղորդում է РИА Новости-ն:
Ըստ BFMTV հեռուստաալիքի տվյալների՝ ակցիային մոտ 15 հազար մարդ է մասնակցում:
Ինչպես հայտնի է դարձել, ակցիան սկզբում խաղաղ է անցել, այն տեղի է ունեցել Փարիզի ծայրամասում գտնվող դատարանի շենքի մոտ: Սակայն որոշ ժամանակ անց ցուցարարները կիսվել են: Բողոքի ցույցի մասնակիցների մի մասը դեպի քաղաք է քայլել, որտեղ նրանց ճանապարհին ոստիկանական զորքերն են կանգնած եղել։ Միևնույն ժամանակ, ցուցարարների մյուս մասը սկսել է վիրավորել և սադրել իրավապահներին։
Արդյունքում ոստիկանները ստիպված են եղել մի քանի անգամ արցունքաբեր գազ կիրառել։ Ցուցարարներն ի պատասխան սկսել են շշեր և այլ աղբ նետել նրանց վրա և բարիկադներ կառուցել։
Հիշեցնենք, որ ամերիկյան մի շարք քաղաքներում տեղի ունեցող բողոքի ցույցերը սկսվել են մայիսի 25-ին սոցցանցերում մի տեսանյութի տարածումից հետո, որտեղ ոստիկանը Ջորջ Ֆլոյդ անունով աֆրոամերիկացի տղամարդուն պառկեցրել է գետնին ու ծնկով սեղմում է նրա վզին։ Անտեսելով տղամարդու շնչել չկարողանալու մասին խոսքերը՝ ոստիկանը հրաժարվել է նրան բաց թողնել, ինչի հետևանքով Ֆլոյդը մահացել է: