Միացյալ Նահանգներում ոստիկանության կամայականության, համակարգային ռասիզմի դեմ բողոքի ցույցեր են ընթանում: Դրանք սկսվել են մայիսի 25-ին այն բանից հետո, երբ իրավապահների կողմից բերման ենթարկման ժամանակ մահացել է աֆրոամերիկացի Ջորջ Ֆլոյդը:
ԱՄՆ Կենտուկի նահանգի Լուիսվիլ քաղաքում բողոքի ակցիայի ժամանակ տուժել է Շանին անունով մի աղջիկ, որը փորձել է տեղի ունեցող իրադարձությունները նկարահանել հեռախոսով: Աղջկա լուսանկարները տարածվել են Twitter-ում: Դրանցում երևում են նրա այտուցված աչքերն ու կապտուկները, ինչպես նաև ռետինե գնդակից ճակատի հատվածում ստացած վնասվածքը:
«Այսօր ես մասնակցել եմ բողոքի ակցիային։ Ես նկարահանում էի, երբ ինձ դիպավ ռետինե գնդակը։ Սա է արդյունքը»,- գրել է Շանինը։
Տուժածին իր օգնությունն է առաջարկել Քիմ Քարդաշյանը, որին շատ են հուզել աղջկա լուսանկարները։
«Սարսափելի է և տագնապալի։ Որևէ մեկը կարող է ինձ ասել ինչպես կարող եմ կապվել նրա հետ: Ես կցանկանայի օգնել նրան բժշկական ծառայությունների հարցում, եթե նա դրա կարիքն ունի»,- գրել է Քարդաշյանը Twitter-ում։
Շանինը Twitter-ի իր էջում վերահրապարակել է Քարդաշյանի մեկնաբանությունները՝ հաստատելով, որ աջակցություն է ստացել հայտնի հեռուստաաստղից: