Լուրեր
ՍԴ ճգնաժամը հանգուցալուծող նախագիծը ՍԴ ուղարկելն անթույլատրելի է ու հղի մեծագույն վտանգներով

«Համավարակի ժամանակ հիվանդությանն առնչվող դիվերսիոն հարձակումները պետք է քրեականացնել»: «Առաջին լրատվական»-ի հետ զրույցում «Հանուն Հանրապետության» նախաձեռնության անդամ, ԱԺ անկախ պատգամավոր Արման Բաբաջանյանը, մեկնաբանելով իր այս արտահայտությունը, որ հնչեց Ազգային ժողովում, նշեց, որ իր կարծիքով՝ կորոնավիրուսի համավարակը մի նոր պատերազմ է Արցախյան պատերազմից հետո, և համավարակի տարածման այս ժամանակահատվածում տեղեկատվական հարձակումներն ունեն ոչ պակաս նշանակություն, քան բուն հիվանդության ազդեցությունն է: «Տագնապ, սթրես առաջացնող այդ գործընթացները մասնակիորեն ֆինանսավորվում են արտաքին ուժային կենտրոնների կողմից… Սա սովորական համավարակ չէ, այն ուղեկցվում է տարբեր աշխարհաքաղաքական կենտրոնների կողմից՝ նրանց հայաստանյան ներկայացուցիչների՝ հինգերորդ շարասյան ներկայացուցիչների կողմից՝ ահագնացող տեմպով տեղեկատվական դիվերսիոն հարձակումներով: Այդ իսկ պատճառով ես առաջարկեցի, որ ԱԺ-ն առաջնահերթության կարգով համավարակի այս ողջ ժամանակահատվածում դիտարկի համապատասխան հոդվածները խստագույնս քրեականացնելու հնարավորություն, և մենք կարողանանք դիմակայել տեղեկատվական այս հարձակումներին»:

«Մենք չափազանց բարդ վիճակում ենք,- այսպիսի եզրահանգման է եկել պատգամավորը «Նորք» ինֆեկցիոն հիվանդանոցում որպես կամավոր մեկ օր անցկացնելուց հետո,- ես տեսա լեփ-լեցուն հիվանդանոց, ջանք ու եռանդ չխնայող բժիշկներ, որոնք վստահ են, որ ջերմություն ունեցող քաղաքացիներին տուն ուղարկելը անթույլատրելի է»:

Անդրադառնալով ԱԺ աշխատանքներին և կարևոր օրինագծերին՝ Արման Բաբաջանյանը նշեց, որ կողմ է քվեարկել հանրաքվեն չեղարկելու մասին օրինագծին և հավելեց. «Առաջին օրից հակված եմ եղել, որ Սահմանադրական դատարանի շուրջ առաջացած ճգնաժամը հաղթահարենք Ազգային ժողովում: Հեղափոխության ալիքի վրա ձևավորված այս Ազգային ժողովի գլխավոր պարտականությունը ժողովրդավարության պաշտպանությունն է, և ումի՞ց, եթե ոչ ՍԴ-ից պետք է հենց ԱԺ-ն պաշտպանի ժողովրդավարությունը, որ հայ ժողովուրդը նվաճել է հեղափոխությամբ: Այն ոտնձգությունները, որ քաղաքական հայտարարությունների, այլևայլ գործողությունների տեսքով տեսել ենք ՍԴ առանձին անդամների, մասնավորապես այդ հանցագործների խմբակի կողմից, պետք է իրենց հանգուցալուծումը գտնեին: Շատ կուզենայի, որ հանրաքվեի օրակարգն ամբողջությամբ կարողանայինք ներառել ԱԺ օրինագծում և ՍԴ 7 անդամներից ազատվել, բայց իշխող խմբակցությունը գտավ, որ մասնակի, ավելի փափուկ լուծումը ԱԺ-ում այս հանգրվանում ավելի նախընտրելի է: Կարծում եմ, որ մասնակիորեն, բայց ընդհանուր առմամբ այս քայլը լուծում է ՍԴ շուրջ առաջացած ճգնաժամը»:

Պատգամավորն ընդգծեց, որ ՍԴ ճգնաժամի հարցը օրինականության շրջանակներում որևէ կերպ լուծելը գերկարևոր անհրաժեշտություն է: Արման Բաբաջանյանի կարծիքով՝ ՍԴ ճգնաժամը հանգուցալուծող նախագիծը Սահմանադրական դատարան ուղարկելն անթույլատրելի է և հղի է մեծագույն վտանգներով:

Մանրամասն՝ տեսանյութում:

  • Դիտումներ՝ *