Համաճարակային իրավիճակը Հայաստանում շարունակում է մնալ խիստ լարված։ Այս մասին պարետատան նիստից հետո տեղի ունեցած ճեպազրույցի ժամանակ ասաց Հիվանդությունների վերահսկման և կանխարգելման ազգային կենտրոնի գլխավոր տնօրեն Արտավազդ Վանյանը։
Նրա խոսքով մարտ ամսվա համեմատ մայիսին ունենք դեպքերի 13 անգամ աճ, ինչը խոսում է այն մասին, որ սահմանափակումներից վերացումից հետո առաջացան մարդկանց կուտակումներ, մեծ թվով շփումներ. «Կուզեի հորդորել ու խնդրել բնակչությանը, որ պահպանեն կանոնները։ Հնարավորինս զերծ մնալ ու չմասնակցել հանդիսություններին։ Անգամ անհրաժեշտության դեպքում անցկացնել բավականին քիչ թվով մարդկանցով և եթե հնարավոր է բացօթյա՝ պահպանելով կանոնները։ Վերջին վերլուծությունները ցույց են տալիս, որ հատկապես պետք է զերծ մնալ մասնակցելուց հոգեհանգիստների արարողություններին, թաղման արարողություններին, քանի որ վերջին մի քանի դեպքերը ցույց տվեցին, որ ունեցանք ուղղակիորեն բռնկումներ։ Հորդորում եմ ուղղակի զերծ մնալ նման արարողություններին մասնակցելուց»,-ասաց Արտավազդ Վանյանը։
