Այսօր՝ հունիսի 2-ին, Ազգային ժողովում շարունակվում է հերթական նիստը: Այժմ քննարկվում է Ֆիզիկական անձանց բանկային ավանդների հատուցումը երաշխավորելու մասին օրենքում փոփոխություն կատարելու մասին օրենքի նախագիծը:
Թեմայից շեղվելով` անկախ պատգամավոր Արման Բաբաջանյանը հայտարարեց. «Երեկ հայտնի դարձավ, որ ՀԾԿՀ-ն ուսումնասիրել է «Գազպրոմ Արմենիա» ընկերության բաժանորդներին հասնող գազի գինը բարձրացնելու հայտը և սեփական առաջարկություններ է ներկայացրել, ըստ որոնց` ՀՀ-ում բնական գազի գնաճը կկազմի 4 տոկոս, գազի գինը գազ սպառող քաղաքացիների համար չպետք է թանկանա: «Գազպրոմ Արմենիա»-ն առաջարկել էր նույնական գին սահմանել բոլոր բաժանորդների համար` չեղարկելով սոցիալապես անապահովներին մատչելի գնով գազի տրամադրումը, ինչի արդյունքում գազը նրանց համար 36 տոկոսով կթանկանա: «Գազպրոմ Արմենիան» ներկայացրել է մի քանի այլ փոփոխություններ ևս, որոնք ընդունելու դեպքում սպառողների համար գազը միջինում 11 տոկոսով կթանկանա»:
Նրա խոսքով` էական չէ, թե քանի տոկոսով է բարձրանալու սակագինը, խնդիրը ինքնին թանկացման փաստն է` միջազգային շուկաներում էներգակիրների էական էժանացման դեպքում:
Ինչպես նշեց պատգամավորը` Ռուսաստանը եվրոպական երկրներին մատակարարվող գազի գինը նկատելիորեն նվազեցնում է. «Սա ռազմավարական գործընկեր երկրի կողմից մեզ ուղղված ոչ բարեկամական քայլ է, որն ակնհայտորեն ունի քաղաքական բաղադրիչ: Ամեն անգամ գազի սակագնի քննարկման ժամանակ մեզ ուրվականի պես այցի է գալիս Հայաստանի հանցավոր անցյալը. 2013թ. գազային խայտառակ պայմանագրի արդյունքում է Ռուսաստանը գազային տոտալ մենաշնորհ հաստատել Հայաստանում: Մենք այսօր գազի գնի յուրաքանչյուր թանկացման ժամանակ վճարում ենք այդ հանցավոր անցյալի, նախկին իշխանությունների կնքած հակապետական գործարքների համար: Միակ ելքը այդ խայտառակ համաձայնագրերի վերանայումն է: Սա հրամայական է, այլևս ազգային անվտանգության սպառնալիք: Եթե դա տեղի չունենա, մենք շարունակելու ենք ապրել գազային ստրկության պայմաններում` ամեն անգամ գազի թանկացման տեսքով ապտակ ստանալով մեր ինքնիշխանությանը»:
Մանրամասները՝ տեսանյութում:
