Զուգահեռներ անցկացնել և համեմատել այն, ինչ կատարվում է Բելառուսում, Հայաստանի կամ Ուկրաինայի իրադարձությունների հետ՝ չի կարելի: Այս մասին հայտարարել է Ալեքսանդր Լուկաշենկոն՝ հանրապետության պետական անվտանգության կոմիտեի նախագահ Վալերի Վակուլչիկի հետ հանդիպման ժամանակ:
«Պետք չէ մեզ համեմատել, ինչպես վերջերս հարևան երկրի պարբերականն էր արել՝ գրելով, որ այստեղ, մեզ մոտ նոր Փաշինյաններ, նոր Զելենսկիներ են հայտնվել: Մենք Փաշինյաններ և Զելենսկիներ չունենք: Անկախ նրանից, թե ինչպես են տեղի ունեցել իրադարձությունները Հայաստանում և Ուկրաինայում, ամեն դեպքում, նրանք տաղանդավոր մարդիկ են՝ և՛ Զելենսկին, և՛ Փաշինյանը: Ես նրանց հետ արդեն մոտիկից ծանոթ եմ: Նրանք, անխոս, տաղանդավոր մարդիկ են, հայրենասեր և որ գլխավորն է՝ իրենց երկրի նվիրյալն են»,- ասել է նա:
Բելառուսի առաջնորդի խոսքով, «մերոնցից ոմանք ցանկանում են կոպեկներով վաճառել այն ամենը, ինչն այստեղ ստեղծվել է ոչ միայն նախագահ Լուկաշենկոյի, այլև ժողովրդի կողմից: Եվս մեկ անգամ ընդգծում եմ, «մայդանացվածներին» եմ սա ասում, որ մենք երբեք թույլ չենք տա ապակայունացնել իրավիճակը մեր երկրում»,- հայտարարել է Լուկաշենկոն:
Վերջերս, մասնավորապես, բլոգեր Սերգեյ Տիխանովսկու՝ Զելենսկիին և Փաշինյանին նմանության մասին գրել էր «Կոմերսանտ»-ը՝ հղում անելով բելառուսական սոցիոլոգ Անդրեյ Վարդոմացկիին: