Ադրբեջանի ազգային անվտանգության նախկին նախարար Էլդար Մահմուդովի զավակները 111 միլիոն դոլարը գերազանցող ակտիվներ և էլիտար անշարժ գույք ունեն Լոնդոնում, այդ թվում՝ 21 միլիոն դոլար արժողությամբ շքեղ առանձնատուն: Այս մասին հայտնի է դարձել OCCRP-ի լրագրողների, Finance Uncovered-ի և Transparency International-ի հետաքննության արդյունքում:
2019-ի նոյեմբերին հաքերային հարձակում է իրականացվել Cayman National Bank-ի հաճախորդների տվյալների բազայի վրա: Լրագրողները վերլուծել են այդ տվյալները և բանկի հաճախորդների ցանկում հայտնաբերել ադրբեջանցի նախկին պաշտոնյային:
Հետաքննող լրագրողները պարզել են, որ անշարժ գույքն ու ակտիվները գրանցված են Մահմուդովի որդու և դստեր՝ Անարի և Նարգիզի անուններով:
Մահմուդովը պաշտոնանկ է արվել 2015 թ.-ին: Երկրի իշխող ընտանիքի հետ ազգակցական կապեր ունեցող նախկին պաշտոնյայի հրաժարականի հանգամանքների, ապա ենթադրվող ձերբակալության շուրջ ադրբեջանական պաշտոնական աղբյուրները լռում են: Ըստ շրջանառվող տեղեկությունների՝ Մահմուդովն առավել բարձր պաշտոն ստանձնելու հավակնություններ ուներ, ինչին հասնելու համար էլ գործի էր դրել երկրի ամենազորեղ գերատեսչությունը՝ հարուցելով անձամբ նախագահ Իլհամ Ալիևի զայրույթը։ Որոշ անանուն վկայությունների համաձայն, Ազգային անվտանգության նախարարությունը վերահսկողության տակ էր պահում երկրի գործարար միջավայրը՝ տարբեր ճանապարհներով փորձելով տիրանալ խոշոր գումարների։