Մեր դիրքորոշումը միշտ եղել է այն, որ քրեական օրենսգրքի 300.1 հոդվածի հետ կապված իրավական անորոշության բացարձակ ոչ մի խնդիր չկա: Այս մասին այսօր՝ հունիսի 1-ին, ԱԺ-ում լրագրողների հետ ճեպազրույցում նշեց ՀՀ գլխավոր դատախազ Արթուր Դավթյանը:
«Այն շատ որոշակի է, եւ հետադարձ ուժի առումով էլ ոչ մի խնդիր չկա: Մեր բոլոր փաստարկները, եթե նկատել եք, պայմանավորվել են գործի տվյալների հետ: Այսինքն ինչ է նկարագրված մեղադրանքի ծավալի մեջ, եւ այդ մեղադրանքի ծավալը, այսինքն կոնկրետ արարքները այդ հոդվածի հետ կանխատեսելիության առումով համադրվում են, թե ոչ:
Հիմա Եվրոպական դատարանն ի՞նչ ասաց ի պատասխան ՍԴ-ի հարցի. Ասաց, որ դա պետք է որոշվի ամեն կոնկրետ դեպքում ամեն կոնկրետ քրեական գործի տվյալներից ելնելով: Այսինքն այն, ինչ մենք ասում էինք տարիներ շարունակ: Ես կարծում եմ, որ ՄԻԵԴ-ի կողմից հարցման առնվազն երկու հարցին չպատասխանելով, դրանք վերացական գնահատելով, երկու հարցերին էլ տալով բոլորիս համար աքսիոմալ դիրքորոշում, որոնց ՄԻԵԴ-ը բազմաթիվ գործերով անդրադարձել է, ընդամենը ավելի հաստատեց մեր նախկին դիրքորոշումը, որ քննության այս փուլում այդ գործը ՍԴ վարույթ ընդունվելու գործ չէր: Այդ առումով մենք նաեւ իրավական արդյունք ենք ունեցել, որովհետեւ այն դիմումը, որ ՍԴ-ն ընդունել է եւ որի հիման վրա իրականացնում է այդ վարույթը, դատավոր Դավիթ Գրիգորյանի կողմից կայացված այդ ակտը դատարանի կողմից բեկանվել է եւ ըստ էության, կարող ենք ասել, որ այսօր օրինական ուժի մեջ մտած ակտ չկա, որը պահանջում էր ՍԴ-ից այդ գործի վարույթի իրացումը»,-հայտարարեց Արթուր Դավթյանը:
