«Ժողովրդական հեքիաթները մեր նախնիներից մեզ ուղղված ծածկագրված ուղերձներ են և ունեն բոլոր խնդիրների պատասխանները: «Առաջին լրատվական»-ի հետ զրույցում փիար մասնագետ, հեքիաթասաց Հայկ Կիրակոսյանը նշեց, որ հեքիաթները լայն այլաբանության դաշտ են և ամփոփում են զանազան խնդիրներ, որոնք կարող են ի հայտ գալ տարբեր անուններով: Հեքիաթներում բարին միշտ հաղթում է չարին, բայց բարին պարտադիր պետք է ուժեղ լինի»:
Ինչ վերաբերում է համաճարակներին, Հայկ Կիրակոսյանի դիտարկմամբ, դրանք նույնպես իրենց արտացոլումն են գտել հեքիաթներում և էպոսում. «Օրինակ՝ «Հայոց տիեզերավեպում» նկարագրվում է, որ դա մի արհավիրք է, որի առաջ կանգնում է Սանա տան ամբողջ բնակչությունը. դա առյուծն էր, որ փակել էր ճանապարհը և սովի մատնել ժողովրդին: Իսկ հեքիաթներում սա նման է ծերունու՝ Հալիվորի անեծքին, որի անեծքից չորանում է ամբողջ թագավորությունը, հաճախ՝ ամբողջ աշխարհը: Նաև Աղայանի «Արեգնազան կամ կախարդական աշխարհ» հեքիաթում կա դրվագ, որտեղ Արեգը հասնում է մի քաղաք, որտեղ ամեն ինչ քարացած է: Ասում ենք՝ թագավարակ, բայց սա նույնքան էլ քարացնող վարակ է, որովհետև աշխարհում հսկայական թվով գործընթացներ կանգ են առել… Անշուշտ, հեքիաթներում առկա են նաև լուծումներ»:
«Պետության ղեկի մոտ կանգնած ով էլ որ լինի, որքան էլ համակրելի լինի, հատկապես այս աղմուկի մեջ ունակ չէ ինքնուրույն կայացնել որոշում, եթե իր կողքին Հալիվորի համակարգից ներկայացուցիչ չունի՝ դրանք պալատական խորհրդականներն են, հեքիաթասացները, անգամ հաճախ խեղկատակները, որոնք առաջնորդին ասում են՝ արի՛, հեքիաթ, առակ լսելու ժամն է,- նշեց Հայկ Կիրակոսյանը: -Մեզ տրված խաղաղությունը անհոգաբար մսխվում է: Առողջ քննադատության փոխարեն աղմուկ է: Հզոր ԱՄՆ-ին տվեք հայ նախագահ, կարճ ժամանակում անկման կհասցնի, կդարձնի Հայաստան:
Մեր երկրի ղեկավարը պարարտ հող է նախապատրաստել, բայց Հազարան բլբուլին բերելու համար միջոցներ չեն ձեռնարկվել»:
Մանրամասն՝ տեսանյութում:
