Երևանի ընդհանուր իրավասության դատարանում Վարդան Ա. Գրիգորյանի նախագահությամբ ավարտվել է Դենիս Ս.-ի և Լևոն Բ.-ի գործի քննությունը:
Նախաքննական մարմինը Դենիս Ս.-ին՝ ՀՀ քրեական օրենսգրքի 34-184 հոդվածի 1-ին մասով, Լևոն Բ.-ին՝ ՀՀ քրեական օրենսգրքի 38-34-184 հոդվածի 1-ին մասով մեղադրանքներ էր առաջադրել այն բանի համար, որ Դենիս Ս.-ն, հանդիսանալով «Կարմիր արծիվներ» ֆուտբոլի հավաքականների երկրպագուների շարժում» ՀԿ նախագահը, Հայաստանի ֆուտբոլի ֆեդերացիային խաբեության եղանակով խոշոր չափերի գույքային վնաս պատճառելու դիտավորությամբ 2019 թվականի հունիսի 8-ին կայանալիք Հայաստան-Լիխտենշտեյն ֆուտբոլային հանդիպման ժամանակ «երկրպագման գործընթացն առավել արդյունավետ կազմակերպելու» պատրվակով, տոմսերը նախատեսված արժեքից 50% զեղչով ձեռք բերելու համար 2019 թվականի մայիսի 20-ին գրավոր դիմել է Հայաստանի ֆուտբոլի ֆեդերացիային և վստահությունը չարաշահելով, խաբեությամբ 2019 թվականի հունիսի 4-ին 50% զեղչված՝ 2 հազար դրամ արժեքով ձեռք է բերել վերոհիշյալ ֆուտբոլային հանդիպման՝ 4 հազար դրամ արժեքով 496 հատ տոմս:
Այնուհետև ստացված տոմսերի մի մասը ՀԿ նախագահը փոխանցել է շարժման երկրպագուներին, մյուս մասն իրական՝ 4 հազար դրամ արժեքով վաճառելու, արժեքային տարբերությունը կազմող գումարների չափով շահ ստանալու նպատակով Վ. Սարգսյանի անվան մարզադաշտում որպես պահակ աշխատող Լևոն Բ.-ի օժանդակությամբ, վերջինիս միջոցով 2019 թվականի հունիսի 6-ին և 7-ին փոխանցել է մարզադաշտի տոմսավաճառներին, ովքեր ստացված տոմսերից 75 հատը 4 հազար դրամով վաճառել են քաղաքացիներին, իսկ չվաճառված 336 տոմսերը հայտնաբերվել են իրավապահների ձեռնարկած միջոցառումների արդյունքում:
2020 թվականի փետրվարի 1-ին ընդհանուր իրավասության դատարանում ստացվել է տուժողի՝ Հայաստանի ֆուտբոլի ֆեդերացիայի նախագահի դիմումը, համաձայն որի՝ Ֆեդերացիան հաշտվել է ամբաստանյալների հետ, վերջիններս ամբողջությամբ հատուցել են իրենց գործողությունների արդյունքում ՀՀ ֆուտբոլի ֆեդերացիային պատճառած գույքային վնասը:
Հաշտության հիմքով դիմումատուն խնդրել է դադարեցնել ամբաստանյալների նկատմամբ քրեական հետապնդումը և կարճել քրեական գործի վարույթը:
Դատական նիստում ամբաստանյալները չեն առարկել դիմումի դեմ, հայտնել են, որ իրոք հաշտվել են տուժողի հետ, հատուցել են պատճառված նյութական վնասը, համաձայն են ո՛չ արդարացման, այլ՝ հաշտության հիմքով իրենց քրեական հետապնդումը դադարեցնելուն և քրեական գործի վարույթը կարճելուն:
Դատարանը տուժողի դիմում-միջնորդությունը հիմնավոր է գնահատել, արձանագրել է, որ հիշյալ գործը մասնավոր հետապնդման գործ է համարվում: Նմանատիպ գործերը հարուցվում են ոչ այլ կերպ, քան՝ տուժողի բողոքի հիման վրա: Մեղադրյալի կամ ամբաստանյալի հետ տուժողի հաշտության դեպքում նմանատիպ քրեական գործերի վարույթը ենթակա է կարճման:
Դատարանը վճռել է՝ ՀՀ քրեական օրենսգրքի 34-184 հոդվածի 1-ին մաով մեղադրվող Դենիս Ս.-ի և 38-34-184 հոդվածի 1-ին մասով մեղադրվող Լևոն Բ.-ի նկատմամբ քրեական հետապնդումը դադարեցնել, գործի վարույթը կարճել՝ ամբաստանյալների հետ տուժողի հաշտության հիմքով:
