Կրթության, գիտության, սպորտի և մշակույթի նախարար Արայիկ Հարությունյանն այսօրվա ուղիղ միացման ժամանակ հերքեց այն խոսակցությունները, թե իրենք մտադիր են սեպտեմբերին դասերը վերսկսել հեռակա։ Նա ասաց, որ իրենք պետք է հասնեն նրան, որ հնարավոր լինի սեպտեմբերին սովորական դպրոց հաճախելու մշակույթը վերադարձնել։
Հարությունյանը այս համատեքստում խոսեց պատերազմի մասին։ Նա ասաց, որ եթե Ադրբեջանի հետ հիմա պատերազմ չկա, դա չի նշանակում, որ բանակը չպետք է պատրաստ պահել։ Նախարարի խոսքով՝ կորոնավիրուսի դեմ էլ է պատերազմ մղվում, սակայն այդ հակամարտության մեջ հստակ ճակատ չկա։
Ինչ վերաբերում է սեպտեմբերին դասերի վերսկսմանը, նա նշեց, որ գոնե տարրական դասարանների աշակերտները պետք է նորմալ դասի հաճախեն, որպեսզի հետագայում անհրաժեշտության դեպքում կարողանան դասերը սովորել նաև հեռավար եղանակով։ Նրա խոսքով՝ պետք է կորոնավիրուսի դեմ պայքարել այնպես, որ հնարավոր լինի այդ աշակերտներին ուղարկել դպրոց։
