Չնայած, տարբեր աղբյուրներից շարունակ տեղեկություններ են տարածվում բելառուսական ֆուտբոլային ակումբներում կորոնավիրուսի տարածման մասին, այնուամենայնիվ այս երկրի առաջնությունը շարունակվում է ընթանալ բնականոն հունով։ Նախօրեին տեղեկություն էր տարածվել նաև, որ կորոնավիրուսով է վարակվել «Տորպեդո-ԲելԱԶ»-ի հայ կիսապաշտպան Անդրեյ Խաչատուրյանը։ Վերջինիս, ինչպես նաև պաշտպան Մաքսիմ Բորդաչևի ինքնազգացողությունը վատացել էր և նրանք գտնվում են բժիշկների հսկողության տակ։
Առաջիկա երեքշաբթի Խաչատուրյանը և Բորդաչևը կթեստավորվեն։ Նշենք, որ Խաչատուրյանը հանդիսանում է Բելառուսի առաջնության լավագույն կիսապաշտպաններից մեկը։ Օրեր առաջ «Իսլոչի» գվինեացի հարձակվող Մոմո Յասանեն այսօր հայտարարել է, որ իր մի քանի թիմակիցներ վարակված են կորոնավիրուսով։ «Տեղեկացնում եմ, որ «Իսլոչի» մի քանի ֆուտբոլիստներ վարակված են COVID-19-ով։ Նրանց առողջություն եմ մաղթում։ Միևնույն ժամանակ խնդրում եմ, որ հայտարարվի կարանտինային ռեժիմ։ Այո, Աստված մեզ կօգնի, բայց մինչև ֆուտբոլ խաղալը պետք է լիներ կարանտին, և պահպանվեին սանիտարական տարրական նորմերը»,- Թվիթերում գրել է գվինեացի հարձակվողը։ Վերջինս առաջին ֆուտբոլիստն է, ով բարձրաձայնել է բելառուսական ֆուտբոլում տիրող վիճակի մասին։Միջազգային լրատվամիջոցները Յասանեի աղմկահարույց հայտարարությունը որակել են որպես օգնություն։ Իրավիճակն իսկապես պայթյունավտանգ է։ Ոչ պաշտոնական տեղեկություններով՝ Մինսկի «Դինամոյում» և բելառուսական ևս մի քանի թիմերում մեծ թվով ֆուտբոլիստներ են վարակված։
Այս մասին, սակայն, պաշտոնապես չի հայտարարվում։ Ավելին, նշվում է, որ թիմերին ուղղակի ստիպում են խաղադաշտ դուրս գալ։ «Վստահեցնում եմ, որ Խաչատուրյանի և Բարդաչևի հետ ամեն ինչ կարգին է։ Նրանք այսօր եկել էին մարզադաշտ մեզ աջակցելու։ Երեքշաբթի նրանք էքսպրես թեստեր կհանձնեն և եթե պատասխանը բացասական եղավ կվերսկսեն մարզումները»,- հայտարարել է «Տորպեդո-ԲելԱԶ»-ի գլխավոր մարզիչ Յուրի Պունտուսը։ Երկրպագուների շրջանում խոսակցություններ էին տարածվել, որ Խաչատուրյանի վիճակը ծանր է, իսկ թիմում իրական համաճարակ է բռնկվել։ Ավելի վաղ Telegram-ի NEXTA ալիքը տեղեկություն էր տարածել, որ Գրոդնո քաղաքի «Նեման» հոկեյի թիմի միանգամից 23 խաղացողներ վարակվել են կորոնավիրուսով։ Հոկեյի ֆեդերացիան և իշխանությունները որևէ մտադրություն չունեն դադարեցնելու առաջնությունը։ Ավելին, պաշտոնական հայտարարություն էր տարածվել, որ հերթական տուրի հանդիպումները պետք է կայանան, և այն ակումբները, որոնք կհրաժարվեն սահադաշտ դուրս գալ, պատժամիջոցների կենթարկվեն։
«Վարակված են թե հիմնական և թե երիտասարդական թիմի հոկեյիստները։ Այնուամենայնիվ, մեզ ստիպում են մարզվել և մասնակցել հանդիպումներին։ Ակումբի նախագահը, փոխանցելով Լուկաշենկոյի խոսքերը, մեզ ասել է, որ եթե նստեցիք տանը, ի՞նչ եք լափելու։ Սա ուղղակի տեռոր է»,- NEXTA ալիքի հետ զրույցում ասել էր խաղացողներից մեկը։
Ինչևէ, Եվրոպայի ուշադրության կենտրոնում հայտնված Բելառուսի ֆուտբոլի առաջնությունում շարունակում է փայլել Հայաստանի ազգային հավաքականի և «Նեմանի» հարձակվող Գեղամ Կադիմյանը։ Վերջինս հերթական անգամ դարձել է գոլի հեղինակ։ 11-րդ տուրում «Նեմանն» արտագնա խաղում մրցեց և 0:2 հաշվով առավելության հասավ «Գորոդեայի» նկատմամբ: Կադիմյանը «Նեմանի» մեկնարկային կազմում էր և 67-րդ րոպեին 11 մետրանոցի շնորհիվ բացեց խաղի հաշիվը: Սա Կադիմյանի 7-րդն. գոլն էր Բելառուսի առաջնությունում: Նա գլխավորում է առաջնության ռմբարկուների ցուցակը։
