«Արտագաղթը կանխելու տարբերակ չկա, միակ ձևը երկրի զարգացման ռազմավարությունը փոխելն է»,- «Առաջին լրատվականի» հետ զրույցում նման կարծիք հայտնեց ազգագրագետ, պատմական գիտությունների թեկնածու Աղասի Թադևոսյանը:
Ըստ նրա՝ այլ կերպ չի կարելի կանխել արտագաղթը, որովհետև Հայաստանը հետամնաց երկիր է, իսկ բոլոր հետամնաց երկրներից մարդիկ միշտ գնում են ավելի զարգացած երկրներ: Ընդ որում, Ա. Թադևոսյանի խոսքով, տարբեր կարգի որակ ունեցող մարդիկ տարբեր կարգի որակ ունեցող երկրներ են ընտրում՝ քիչ որակովները գնում են Ռուսաստան, ավելի որակովները՝ արևմուտք: Նա շեշտեց, որ միակ ձևը երկրի զարգացման ռազմավարությունը փոխելն է, տնտեսությունը դիվերսիֆիկացնելը, զբաղվածության ոլորտների բազմազանություն ձևավորելը, որպեսզի մարդիկ մնան, աշխատեն, տեսնեն հեռանկար:
«Այդ ուղղությամբ այս տիպի կառավարությունը, այս տիպի իշխանությունը չի կարող քայլեր անել, որովհետև ինքը բնույթով կոռումպացված, քրեական իշխանություն է»,- նշեց Ա. Թադևոսյանը: