Վրաստանը պատրաստ է աջակցել Հայաստանին այն դեպքում, եթե հարևան պետության առողջապահության նախարարությունը դիմի վրացական կողմին օգնություն ստանալու համար, հայտարարել է Վրաստանի հիվանդությունների վերահսկման և հանրային առողջության ազգային կենտրոնի տնօրեն Ամիրան Գամկրելիձեն Facebook-ում վրացական կենտրոնի էջում առցանց ճեպազրույցի ժամանակ:
Նա պատասխանել է այն հարցին, թե Վրաստանը կօգնի՞ Հայաստանին կորոնավիրուսի դեմ պայքարում և կկարողանա՞ արդյոք Հայաստանից հիվանդներ ընդունել, հաշվի առնելով, որ վերջին շրջանում այս երկրում իրավիճակը կտրուկ վատացել է:
Ամիրան Գամկրելիձեն նշել է, որ Հայաստանի երկու քաղաքացի արդեն բուժում է ստանում Վրաստանում՝ կորոնավիրուսով հիվանդների համար նախատեսված կլինիկաներում: Նրա խոսքով, հիվանդությունների վերահսկման վրացական կենտրոնը վաղուց ակտիվ համագործակցում է Հայաստանի նմանատիպ կենտրոնի հետ, և անցած տարիներին այս կազմակերպությունները բազմիցս օգնություն են ցուցաբերել միմյանց՝ ներառյալ պատվաստանյութերի և այլ նյութերի փոխանակումը, այդ թվում՝ հեպատիտ C-ի բուժման համար դեղամիջոցները:
«Եթե Հայաստանի հիվանդությունների վերահսկման կենտրոնը դիմի մեր կենտրոնին օգնության խնդրանքով, որը մեր իրավասության շրջանակում է, բնականաբար, մենք կցուցաբերենք այդ օգնությունը: Դա վերաբերում է թեստավորմանն ու այլ բուժագործություններին, որոնք իրականացնում է մեր կենտրոնը: Ինչ վերաբերում է բուժմանը, ապա ես վստահ եմ, որ այս հարցում նույնպես Վրաստանի կառավարությունն ու Առողջապահության նախարարությունը չեն մերժի, եթե Հայաստանը դիմի օգնության համար: Բայց դրա համար պետք է համապատասխան դիմում լինի ՀՀ առողջապահության նախարարությունից»,- պարզաբանել է Գամկրելիձեն: