Հայաստանում այսօր՝ մայիսի 29-ին, հաստատվել է կորոնավիրուսով վարակվածության 460 դեպք, 7 մարդ մահացել է։ Այս մասին հայտնում է Հիվանդությունների վերահսկման և կանխարգելման ազգային կենտրոնը:
Այսպիսով, մայիսի 29-ի ժամը 11-ի դրությամբ՝ կորոնավիրուսով վարակվել է 8676 մարդ։ Ընդհանուր առմամբ գրանցվել է կորոնավիրուսային հիվանդությունից մահվան 120 դեպք։
Նախօրեին կորոնավիրուսից 15 մարդ է մահացել, որից երկուսը քույրեր են եղել։ Մահացածները Արագածոտնի մարզի Աղձք համայնքից են։
«Առաջին լրատվական»-ի հետ զրույցում համայնքի ղեկավար Արթուր Ավետիսյանը նշեց, որ մահացած քույրերից մեկը մոր հետ բնակվում էր Երևանում, մյուս քույրը՝ Աղձքում։ «Հիմա չգիտեմ՝ մորի՞ց են վարակվել, թե՞ Երևանից են վարակը բերել։ Թաղումն էլ շատ մարդաշատ չի եղել։ Չգիտեմ, չեմ հասկանում՝ ոնց է եղել: Էն մի քույրը մեր բնակիչը չի»,- ասաց համայնքի ղեկավարը։
Արթուր Ավետիսյանի խոսքով՝ համայնքում ինքը չի թույլատրում ոչ մի միջոցառում կազմակերպել, անգամ հոգեհանգստի կամ հուղարկավորության արարողությունները մի քանի հոգուց ավելի մարդկանցով չեն կատարվում։ Համայնքապետի տեղեկացմամբ՝ գյուղում մինչ այս կորոնավիրուսով վարակման ոչ մի դեպք չի գրանցվել։ Այս պահի դրությամբ կա հաստատված 8-10 դեպք։ Աղձքի համայնքապետի խոսքով՝ բոլորը մեկուսացած են, նրանց հետ կոնտակտավոր անձինք՝ ինքնամեկուսացած։ Իսկ գյուղում խուճապ չկա՝ ավելացրեց գյուղապետը։