Այսօր ԱԺ ՀՀԿ-ական պատգամավոր Հովհաննես Սահակյանը, արձագանքելով այն լուրերին, թե ՀՀԿ ցուցակից դուրս են մնալու ավագ սերնդի հանրապետականները՝ Կարախանյանը, Զոհրաբյանը, թե Սաշիկ Սարգսյանը ևս այս անգամ չի առաջադրվելու պատգամավորության թեկնածու, նշեց, որ նույնիսկ խորհրդի նիստերում նման հարց, հարցադրում դեռևս չի քննարկվել:
Ինչ վերաբերում է հարցին, թե նոր ընտրացուցակում նոր դեմքեր, նոր մարդիկ կհայտնվե՞ն, ընտրողներին անակնկալներ սպասվո՞ւմ են՝ Հովհաննես Սահակյանը պատասխանեց. «Պարզ է և բնական, որ մշտապես յուրաքանչյուր կառույց, յուրաքանչյուր ԱԺ և՛ նորության, և՛ թարմության անհրաժեշտություն ունի: Եթե հետ հայացք գցենք, կտեսնենք, որ դա այդպես էլ եղել է: Բայց այսօրվանից կանխատեսել, որ այս-այն մարդիկ չեն լինի, իմ կարծիքով՝ տեղին չէ, քանի որ զուտ կանխատեսումների դաշտից է: Այսինքն՝ հիմնավոր, ռեալ ինֆորմացիոն հիմք չունի: Աշնանը այս հարցերի պատասխանը կտանք»: