Հայաստանում ստեղծվելու է փաստահավաք հանձնաժողով, որն ուսումնասիրելու է 1991թ. մինչև 2018թ. կառավարման համակարգում թույլ տրված անօրինականությունները: Հանձնաժողովն ուսումնասիրելու է, օրինակ, ընտրակեղծիքները, մարդու իրավունքների խախտումները, ունեզրկումները, այլ կերպ ասած՝ հանձնաժողովը զբաղվելու է մոտ 3 տասնամյակի ապօրինությունների գույքագրմամբ: Ինչո՞ւ է դա պետք անել այսօր:
Թեմայի շուրջ «Առաջին լրատվական»-ի հետ քննարկմանը մասնակցեցին քաղաքագետ Ռուբեն Մեհրաբյանը, քաղտեխնոլոգ Կարեն Քոչարյանը և վերլուծաբան Գոռ Մադոյանը:
Ռուբեն Մեհրաբյանի դիտարկմամբ՝ այս հանձնաժողովի ստեղծումը պետք է ՀՀ քաղաքացիներին և Հայաստանին, որպես պետություն՝ դեպի առաջ իր ընթացքը ապահովելու համար, և սրա հիմքում արդարության վերականգնման գաղափարն է: «Սա յուրովի ճշմարտության հանձնաժողով է, որը պետք է բացահայտի եղելությունը և հետևություններ անի, որոնք ընդունելի կլինեն հանրության մեծամասնության համար: Ի սկզբանե պետք է ընդունենք, որ իդեալական ոչինչ չի կարող լինել, բայց պետք է դրան ձգտել»:
Գոռ Մադոյանի կարծիքով՝ հանձնաժողովի աշխատանքը կարող է տարիներ տևել: «Հանձնաժողովի աշխատանքներում առաջնային խնդիր է լինելու կուտակված կապիտալի լեգիտիմացման հարցը, ինչը կարևոր է հանրային հաշտեցման համար»,- նշեց վերլուծաբանը:
«Եթե ընտրողական վերաբերմունք չլինի, փաստահավաք հանձնաժողովը կարդարացնի հույսերս,- նշեց Կարեն Քոչարյանը՝ հավելելով, որ հանձնաժողովի աշխատանքի արդյունքը չպետք է կախված լինի հանձնաժողովի կազմից: Արթուր Սաքունցը հավելեց, որ արդյունքները ոչ թե հանձնաժողովի կազմից, այլ հանձնաժողովի մանդատից և աշխատանքի թափանցիկությունից պետք է կախված լինեն: «Նպատակը անցյալից մաքրվելն է. տնտեսական և քաղաքական գործունեության մեջ ամեն ինչը հանրության համար պետք է «սպիտակի», և այլևս հարցեր չպետք է առաջանան»,- նշեց քաղաքագետը:
Կարեն Քոչարյանն ընդգծեց, որ գլխավոր նպատակն այն է, որ ապագայում անցյալի սխալները չկրկնվեն. «Հանձնաժողովի ստեղծումը ինքնանպատակ չպետք է լինի, պետք է պատասխան տան կեղծիքների համար կոնկրետ մեղավորները, որպեսզի ապագա սերունդների համար դա դաս լինի և չկրկնվի»:
Մանրամասն՝ տեսանյութում: