ԱԺ պատգամավոր Արման Բաբաջանյանը ֆեյսբուքյան իր էջում գրել է․
Այսօր Երևանում կայացել է Հայաստանի վարչապետ Նիկոլ Փաշինյանի ու Արցախի նորընտրիր նախագահ Արայիկ Հարությունյանի առաջին պաշտոնական հանդիպումը Հայաստանում։ Հանդիպման օրն ինքնին չափազանց խորհրդանշական է՝ այն տեղի է ունեցել Հայաստանի առաջին Հանրապետության հիմնադրման 102–րդ ամյակի օրը։
Այդ խորհրանշականությունն իր մեջ շատ որոշակի ուղերձ է պարունակում առ այն, որ մենք առավել, քան երբևէ միասնական ենք ու միակամ՝ զարգացնելու հայկական երկու պետությունները։ Բացի խորհրանշանակությունից սակայն այսօրվա հանդիպումը պարունակում էր չափազանց կարևոր մեկ այլ շեշտադրում։ Հայաստանի վարչապետն ու Արցախի նախագահը խոսել են բոլոր ոլորտներում, բայց հատկապես տնտեսական բնագավառում երկու հայկական պետությունների ինտեգրացիայի խորացման անհրաժեշտության մասին։ Հայաստանի ու Արցախի տնտեսություններն ունեն ինտեգրացիայի չափազանց մեծ ներուժ, որի չնչին մասն է այսօր իրացվում։
Եվ շատ կարևոր ու ողջունելի է, որ Արցախի նորընտիր նախագահը Հայաստանի ղեկավարի հետ Երևանում կայացած հանդիպման ընթացքում խոսել է հենց տնտեսական ինտեգրացիայի խորացման մասին։ Հայաստանի ու Արցախի տնտեսությունները օրգանապես կապված են միմյանց հետ ինչպես ենթակառուցվածքային, այնպես էլ ոլորտային հարթությունում։ Բայց մեր տնտեսական համակարգերն ունեն սինխրոնացման, ավելի խորը կոոպերացման ու ինտեգրացիայի մեծ պոտենցիալ, որի իրացումը կհզորացնի մեր երկու երկրների տնտեսությունները։
Տնտեսական ինտեգրացիան համալիր, համակողմանի աշխատանք է, որը պետք է ընթանա բոլոր ուղղություններով ու բոլոր հարթություններում՝ սկսած պետական կառավարման մարմիններից մինչև բիզնես հանրություններ ու արհեստակացական միություններ։
Չափազանց ողջունելի կլինի, եթե երկու հայկական պետությունների ղեկավարների այսօրվա հանդիպման ընթացքում քննարկված ինտեգրացիայի խորացման հարցն առաջիկայում առարկայանա հստակ ռազմավարություններով ու գործողությունների ծրագրերով։
Ինքս՝ որպես Ազգային Ժողովի պատգամավոր պատրաստակամ եմ իմ հնարավորությունների սահմաններում, Արցախի գործընկերներիս հետ համատեղ աշխատել՝ այդ ռազմավարությունների ու ծրագրերի մշակման ուղղությամբ։
Հայաստանի ու Արցախի տնտեսությունները դրական իմաստով դատապարտված են խորը ինտեգրման և պետք է հույս հայտնել, որ տեսանելի ապագայում քաղաքական մակարդակում ձեռք բերված այդ պայմանավորվածությունները միս ու արյուն կստանան երկկողմ ռազմավարությունների ու ծրագրերի տեսքով։
https://www.facebook.com/babajanyana/photos/a.2323937550970292/3325393444158026/?type=3&theater
