«Վերադարձել ենք գրեթե լիաթոք աշխատանքային ռեժիմի՝ պահպանելով պարետատան կանոնները: Գրասենյակ են գալիս աշխատակիցների 30 տոկոսը, միայն առցանց աշխատելով՝ նվազագույ ծավալով էին իրականացվում աշխատանքները, այս պահին ակտիվ աշխատանքներ են սկսվել, սակայն բնականաբար որոշ ծրագրեր հնարավոր չէ իրականացնել այս տարի: Մեր օրակարգը փոխվել է՝ հարմարեցվել է նոր իրականությանը»,- այս մասին «Առաջին լրատվական»-ի հետ զրույցում ասաց Սփյուռքի գործերով գլխավոր հանձնակատար Զարեհ Սինանյանը:
«Ծրագրել էինք, որ սեպտեմբերին երեք համաժողով պետք է կայանար, դրանք հետաձգվել են մինչև հաջորդ տարի: «Ի գործ» ծրագրին մասնակցելու համար դիմել են 800-ից ավելի մասնագետներ, որով նախատեսվում էր լավագույն համալսարաններն ավարտած առնվազն 20 մասնագետի ներգրավել Հայաստանի կառավարման համակարգում, այս հնարավորությունն օգտագործելու ենք, որպեսզի արտերկրից հնարավորինս մեծ թվով մասնագետներ ներգրավենք : Այս ծրագիրը մի քանի նպատակ է հետապնդում, առաջինը՝ Սփյուռքին Հայաստանի հետ կապելն է, երկրորդը՝ կադրային սովի խնդրին ինչ-որ չափով լուծում տալը, երրորդը՝ սա պոտենցիալ հայրենադարձության ծրագիր է: Ամառային ծրագրերը՝ «Քայլ դեպի տուն» և «Առաջնորդների ամառային ակադեմա», ամենայն հավանականությամբ, տեղի չեն ունենա և կփոխարինվեն առցանց ծրագրերով»:
Հարցին, թե պետք է բացառե՞լ, որ սփյուռքահայերն այս իրավիճակում կարող են Հայաստան գալ, Զարեհ Սինանյանը պատասխանեց, որ ցանկություն շատերն ունեն՝ ավելին. «Միլիոնավոր հայերի համար ավանդույթ էր դարձել, որ ամռանը գալու են հայրենիք, և հիմա մարդիկ տառապում են, որ չեն կարող գալ: Առողջապահական իրավիճակի առումով, քանի դեռ համավարակը չենք ճնշել, իրատեսական չէ, որ սփյուռքահայերը գան հայրենիք: Երկրորդ գործոնը ավիափոխադրողների՝ Հայաստան գալու խնդիրն է»:
Զարեհ Սինանյանը կարևորեց դեմոգրաֆիկ խնդրի լուծումը՝ ընդգծելով, որ առանց այդ խնդիրը լուծելու ապագա չունենք:
Մանրամասն՝ տեսանյութում:
Զարեհ Սինանյանն ընդգծեց, որ մոլեգնող տնտեսական ճգնաժամը հնարավոր է շատ հայերի ակամա դրդի վերջնական որոշում կայացնել և տեղափոխվել Հայաստան: Միայն Ռուսաստանում 7 հազար հերթագրված հայրենակից կա, որ ուզում է վերադառնալ: Հայրենադարձվելու ցանկություն ունեցողներ կան նաև Լիբանանում, ԱՄՆ-ում, Ֆրանսիայում, Թուրքիայում, այլ երկրներում:
