Լիբանանում կորոնավիրուսով վարակվածների թիվն աստիճանաբար նվազում է։ Ընդհանուր վարակակիրների թիվը 1168 է, վերջին 24 ժամում 7 վարակակիր, որոնցից 3-ը արտասահմանից են եկել։ Ընդհանուր մահերի թիվը՝ 26։ Այդ մասին «Առաջին լրատվական»-ի հետ զրույցում ասաց Լիբանանի «Ազդակ» օրաթերթի գլխավոր խմբագիր Շահան Գանդահարյանը։
Նա նշեց, որ սահմանափակումները վերանայվել են, երեկոյան 7-ից հետո շրջագայությունն արգելված է։ Մեքենաների համար գործում է զույգ և կենտ համարանիշների դրույթը, այսինքն՝ մի օր զույգ թվով ավարտվող համարներին է թույլատրվում վարել, հաջորդ օրը՝ կենտ։ Հատուկ կանոններով թույլատրվում է սրճարանների և ճաշարանների գործունեությունը։ Քաղաքացիները, Գանդահարյանի խոսքերով, հստակ հետևում են սահմանված կանոններին։
Հայաստանում վարակվածների թվի արագ աճը մտահոգիչ է։ Ըստ Գանդահարյանի՝ հասարակության մոտ ավելի զգոնություն պիտի լինի բոլոր նախազգուշացման միջոցները լիարժեք կիրառելու առումով։
Հարցին՝ այս իրավիճակը կարո՞ղ է արդյոք արագացնել լիբանանահայերի՝ Հայաստան վերադառնալու գործընթացը, Գանդահարյանն արձագանքեց․ «Լիբանանում ֆինանսատնտեսական խոր ճգնաժամ է։ Առայժմ տեղաշարժերը որոշակի առումով սառել են։ Մարդիկ չեն կարողանում ձեռք բերել իրենց դրամատնային գումարները։ Առք ու վաճառքը ևս չի աշխատում։ Եվ սա անկախ կորոնավիրուսի հետևանքով ստեղծված իրավիճակից։ Խորանում է ֆինանսական տագնապը՝ հատկապես արտաքին քաղաքական պատճառներով»։
Արդյոք մեծանո՞ւմ է Հայաստան վերադառնալ ցանկացողների թիվը, Շահան Գանդահարյանը նշեց, որ հայրենադարձության միտումները տեսանելի էին նախքան այս տագնապները․ «Կարծում եմ՝ կշարունակվեն թեկուզ ոչ մասսայական տարողությամբ։ Խնդիրը նաև անմիջականորեն միջոցների հնարավորության հետ է կապված»։
Գանդահարյանի կարծիքով՝ անհրաժեշտ է, որ պետությունը տարբեր ուղղություններով հայրենադարձության հայեցակարգը մշակի և դրա ներքո ընդունի հատուկ օրենսդրություն։ «Այս դեպքում խոսում ենք տարբեր բնույթի ճգնաժամերում հայտնված երկրների հայ համայնքների հայրենադարձության միտումները ուղղորդելու և համապատասխան ծառայություններ մատուցելու մասին»,- նշեց նա։