Արտասահմանցիները, որոնք կորոշեն իրենց հանգիստն անցկացնել Վրաստանում, պետք է Վրաստան ժամանելուց 72 ժամ առաջ կորոնավիրուսի առկայության թեստ հանձնեն:
Միջազգային զբոսաշրջիկների ընդունման սկիզբը դեռ չի նշանակում սահմանների բացում, հայտարարել է Վրաստանի վարչապետ Գեորգի Գախարիան:
«Երբ մենք ասում ենք, որ Վրաստանը զբոսաշրջիկներին ընդունող առաջին երկիրն է լինելու, դա չի նշանակում, որ մենք բացելու ենք սահմանները, եւ մարդիկ անարգել գալու են մեր երկիր: Ոչ, մենք խոսում ենք մաքուր միջանցքների մասին»,-ասել է Գախարիան:
Դրանից բացի, նա նշել է, որ խոսքը գնում է միայն զբոսաշրջիկների կոնկրետ խմբերի մասին, որոնք հանգստանալու են միայն որոշակի հյուրանոցներում, օգտվելու են հատուկ տրանսպորտից եւ ծառայություններից: Ընդ որում, հանգստացողները պետք է երկիր մտնելուց առնվազն 72 ժամ առաջ կորոնավիրուսի առկայության թեստ հանձնեն:
«Հակառակ դեպքում, մենք վտանգի տակ կդնենք մեր հեղինակությունը»,- ասել է Գախարիան:
Նա ընդգծել է, որ Վրաստանն իրեն ներկայացնելու է որպես զբոսաշրջության համար անվտանգ երկիր, ուստի իշխանությունները պետք է ապահովեն, որ Վրաստան ուղևորության ընթացքում օտարերկրացիները COVID-19-ով չվարակվեն:
