Հայաստանի ներքաղաքական կյանքում հռետորական դիմակայության ուժգնությունը նկատելի է և, թերևս, աննախադեպ: Ինչ վտանգներ է այն պարունակում: Թեմայի շուրջ «Առաջին լրատվական»-ի հետ զրույցում ազգագրական պարերի մասնագետ, հասարակական գործիչ Գագիկ Գինոսյանը ներկայացրեց իր դիտարկումները: Մասնավորապես անդրադառնալով Ազգայի ժողովի բառապաշարի «հագուկապին»՝ մեր զրուցակիցը նշեց, որ այս խորհրդարանը չի արտացոլում հայ մարդու տեսլականը: «Բազում խայտառակ միջադեպերից հետո որևէ կողմ հանդես չեկավ ներողությամբ: Կարծում եմ, որ խորհրդարանը և հասարակությունը հոգեփոխվելու կարիք ունեն, առավել ևս՝ կապված նորօրյա մարտահրավերների հետ»,- նշեց Գագիկ Գինոսյանը՝ հավելելով, որ արդարամտության դեֆիցիտ կա:
Այսօր պատմական օր է. 1918թ. այս օրը, Բաշ-Ապարանի, Սարդարապատի, Ղարաքիլիսայի հերոսամարտերից հետո ձևավորվեց Հայաստանի առաջին Հանրապետությունը: Ի՞նչ դասեր ենք քաղել պատմությունից: Անդրադառնալով այս հարցին՝ Գագիկ Գինոսյանը նշեց. «Երբ երիտասարդ էի, մտածում էի, որ հանճարեղ է ասված Չարենցի խոսքը. «Ով հայ ժողովուրդ, քո փրկությունը քո հավաքական ուժի մեջ է», գուցե հանճարեղ միտք է, բայց իրականում պատմականորեն հայերին փրկել են սրբազան խենթերը: Մի քանի անձ կարողացել են ոգեշնչել, ոգին ու գաղափարը փոխանցել իրենց շուրջը հավաքվածներին և հեղաշրջել մի ամբողջ ազգ:
Ինչ վերաբերում է Սարդարապատի ճակատամարտին, իհարկե, խոնարհվում եմ Արամ Մանուկյանի անձի և նրա գործի առաջ, բայց չգիտես ինչու մոռանում ենք այլ կարևորագույն անձանց և չենք ասում, որ մեր պետականության հիմքում հոգևորականն է, որպիսին մենք այսօր կուզենայինք ունենալ: Հիշենք, Գևորգ Ե կաթողիկոս (Սուրենյանց) Տփղիսեցին և կաթողիկոսարանը, չնայած Արամ մանուկյանի և Երևանի պարետ Արշավիր Շահխաթունու հորդորներին, չեն տեղափոխվում ապահով վայր: Կաթողիկոսին հոդորում են հեռանալ իր ամառանոց, ասելով, որ հայոց զորքերը սակավաթիվ են և անզոր են պահել թուրքական զորքերի առաջխաղացումը, իսկ թուրքական զորքերն արդեն Սարդարապատում էին: Պետք է ընդունենք, որ ոչ միայն այդ ճակատամարտի, այլ մեր ճակատագրի բեկումը մի կաթողիկոս էր, որն ասաց. «Չէ, տղերք, դուք սխալվում եք, ձեր կաթողիկոսը փախչող տեսակ չէ: Եթե պետք լինի, ինքս զենք կվերցնեմ, բայց թույլ չեմ տա, որ պիղծ թուրքի ոտքը մտնի հայոց վեհարան»: Եվ կաթողիկոսը հոգևորականներին կոչ է անում աշխարհազորին անդամագրվել և նաև հրամայում է հայոց բոլոր եկեղեցիների զանգերը հնչեցնել: Այսինքն՝ հենց այստեղ է տեղի ունեցել հոգևոր բեկումը, որովհետև նախ ոգին է պարտվում կամ հաղթում, հետո նոր բազուկը, միտքը»:
«Անկախությունը պատասխանատվություն է, կամք է, ոգի ու գաղափար է, որ պետք է պահե»լ,- ընդգծեց Գագիկ Գինոսյանը:
Մանրամասն՝ տեսանյութում: